CPI-M & Congress-i bushisüngdangtsü akhanger

Agartala, January 13 (Agencies): West Agartala police station nung arishi küm 38 tain tebur ka reshikangshiba aser tepsetba bushisüngdangtsüla ta Opposition CPI-M aser Congress teloktemi akhanger.
Lankamura nung alir Sushanta Ghosh ya Honibarnü Tripura police indang cyber crime branch-i apu.
Agartala nung ATM hacking ken o ka dak sendakba nung pa apu aser pa Deobarnep asü.
West Agartala police station nung reshikangshiba ajanga Ghosh asü ta par kinungertemi tai tongloktsür.
Tripura Congress-i par kibong nem sen lakh 25 teyari agüjang ta takhangba agütsüogo.
“Iba tatalokba nung police dak taitsü keta lir. Kodaser police lock-up nung nisung ka soseta asütsü?” ta Congress tir Pijush Biswas-i asüngdang.
Mongulbarnep CPI-M lennir telok kati Lankamura nung asür Ghosh’er kinungertem den ajurutep.
Iba tatalokba ya Tripura High Court nung tang teinyakdak obendanger kati bushisüngdangtsüla. Yamaji asü nung dang ochi metettsü, ta CPI-M lennir Pabitra Kar-i ashi.
“Iba lendong atalokdang mapa nung aliba police ketdangsertem sorkari merenshitsüla” ta Kar-isa ashi.
Paisa National Human Right Commission (NHRC)-i iba ken o nung atema inyaktsü asüngdang.
Hombar aonung Agartala nung CPI-M züngsemtemi tashiyim amshiba police ketdangsertem merenshiang ta takhangba agüja lungkak ait.
Tripura chief minister Biplab Kumar Deb-ia iba tatalokba atema bushisüngdang ka asütsü tetuyuba agütsüogo.