Delhi election atema BJP core group senden amen

New Delhi, Aenjeti/January 13 (Agencies): Delhi Assembly election agitsü mapang ana nung lia Amongnü aonung tesü Union Home Minister, Amit Shah’er kidang Bharatiya Janata Party’ Core Group senden ghonda tenet shi menogo, ta osang ka ajanga metetdaktsü.
Yasüng 8:00 ako nung sendenji tenzük aser tanep 3:00 ako nungang senden tembanga liasü. Iba senden nung BJP working president, JP Nadda, Delhi BJP election in-charge Prakash Javadekar, Shyam Jaju, Manoj Tiwari, Delhi Organisation Minister Siddharthan, Vijay Goel, Bijender Gupta aser Anil Jain nunger aden.
Osang angazükba agi, iba senden nung Delhi nung assembly 45 atema candidates tenüng benoka o lemtep. Central survey aser public survey nung ajemdaker Delhi BJP-i candidates shima liasü aser candidates tenüngji core group senden nung benoka jembi.
Osang angazükba agi, Delhi election nung BJP-i tejak tasenpur aika nem party ticket agütsütsü.
Tanüngba assembly menden 25 atema party-i ano senden ka ayongzüka mener candidates shimtsü, ajisüaka tatembangbuba telemtetbajibo party Central Election Committee-i agitsü.
Election Commission-i Delhi election February 8 nü agitsü, ta sangdongba sülen January 6 nungi Delhi nung Model Code of Conduct (MCC) tenzükogo. Election tembangba sülen February 11 nü votes zünga election osang sangdongtsü.
Taoba Delhi assembly election nung AAP-i menden 70 nungi menden 67 tashi nung takok ngua liasü aser BJP-i menden asem dang angu.