Y.Kikheto-i Mokokchung nung Polling Station tem semdang

Electoral Roll Observer aser Commissioner & Secretary Horticulture, Y. Kikheto Sema-i January 11, 2020 nü Mokokchung kübok polling satation semdangba sülen AROs aser Political telok lenirtem den senden agiba mapang tangokba noksa ka yangi angur.

Dimapur, Aenjeti/January 13, 2020 (TYO): Commissioner & Secretary, Horticulture, Nagaland aser tang tagidak aliba Summary Revision (Election) atema Roll Observer, Y. Kikheto Sema-i January 11, 2020 nü Mokokchung semdanga liasü, ta DPRO sangdong ka ajanga metetdaktsü.
Observer, Y. Kikheto den Deputy Commissioner Mokokchung Limawabang Jamir nati Mokokchung jila kübok tesem balala nung amenoker aliba polling station pungu – (1) Alempang Ward-1, (2) Tongdentsuyong Ward, (3) Alongmen Ward, (4) Sangtemla Ward-1 aser (5) Mongsenbai Ward tem semdanga aser asadanga liasü. Kasa mapang, Y.Kikheto-i BLOs aser Ward züngsemtem den sensaksema liasü.
Polling station tem semdangba sülen, Deputy Commissioner Office Chamber nung Observer, Y.Kikheto-i AROs aser political telok balala den senden agia liasü.
Senden nung Y.Kikheto-i jembiba mapang pai Electoral Roll koba Mokokchung nung tagidak lir, iba maparen ochishia inyaktsü asoshi senden nung adener ajak ayongzüka liasü.
Iba maparen takok ngua inyaktsü asoshi voters list nungi bogus voters agientsüla aser Electorol Roll tasen nung nisung tejangja tenüngtem züluoksemtsüla, ta pai ashi.
Paisa, Nagaland nung Mokokchung ya model district ka kümdaktsütsü aser election ochishia agitsü atema tekümdangtsü sangdongtsü mechi senden nung adener ajak ayongzüka liasü.
Iba senden tembangba sülen Observer-i AROs aser Political telok balala nungi lenirtem den sensaksema liasü aser iba mapang pa den lenirtemi parnok timtem balala lemsatepa liasü, ta kasa sangdong ajanga metetdaktsü.