BJP-i Khristantem jenokdaktsütsü jembir saka Yisu indang kürakyanglu meyangludaktsür: Javed Akhtar

New Delhi, January 13 (Agencies): Nüngtugu ken zülur Javed Akhtar-i Karnataka nung Yisu Khrista indang kürakyanglu yanglutsüba anema noktakertem aitsüogo.
“Parnoki (BJP) kidanger linüktem nung reshikangshi tia ajuruba Khristantem nem senso agütsütsü ta asüküma jembir, saka kasa mapang nung parnoki Bangalore nung Yisu Khrista indang kürakyanglu ka meyangludaktsütsü ta noktaker” ta Akhtar-i Bharatiya Janata Party (BJP)-i aniba Centre sorkar luja metetdaktsü.
BJP aser parnok nem shisatsü agütsür Rashtriya Swayamsevak Sangh (RSS) dena tanga teloktemi Hombarnü Karnataka kübok Kanakapura nung Yisu Khrista indang kürakyanglutsüba anema lungkak aitba sentong ka agi.
Iba kürakyanglu ya Harobele nung yanglutsü sentong lir aser iba yimtsüng nung Khristan tamanger teimba lir.
Congress lennir DK Shivakumar ya Kanakapura nungi MLA lir aser pai iba kürakyanglu yanglutsü atema yariteper.
Shivakumar-i iba kürakyanglu yanglutsüba ya ozüngi melar aser Harobele yimtsüng nung alirtemi meshiba ama yanglur ta metetdaktsüogo.
Iba kürakyanglu ya feet 114 talang asütsü aser ibaji Rio Di Janeiro, Brazil nung aliba Christ The Redeemer kürakyanglu dang nungi talangba asütsü.