Opposition telok 20-i CAA, NRC, NPR magizüktsü lemtet

New Delhi, January 13 (Agencies): Hombarnü Parliament complex nung Congress-i anir senden amendang opposition telok 20-i Citizenship Amendment Act (CAA) agientsü aser National Population Register (NPR) maparen meinyaktsü atema bangzüngtepogo.
“NPR ya National Register of Citizens (NRC) yanglutsü atema inyakyim ka lir. CAA, NPR aser NRC ya ozüngi memelar, kechiyong item maparen ajanga sensakertem, tangar memenepertem, ST/SCs aser oshi o tamangba yimsü nung nübo agi tangar memenepertem dak kongshir” ta tanü opposition teloktemi telemtetba agi.
Pei pei state nung NRC mapa meinyaktsü ta osang sangoktsüba chief minister temi NPR maparen anendaktsütsü, ta parnokisa ashi.
Bengal Chief Minister Mamata Banerjee-i iba senden nung madentsü ta mezüng osang sangoktsü saka lai West Bengal nung NPR mapa meinyakdaktsütsü ta osang sangokja lir. Maneni, Kerala chief minister Pinarayi Vijayan-ia kasa osang metetdaktsüogo.
Rajasthan, Madhya Pradesh aser Chhattisgarh ama Congress-i sorkar yimsü asüba state temia NRC aser CAA mapa magizüktsü ta metetdaktsüogo.
Citizenship Act anema lungkak aitba aser campus balala nung ozüng alema inyakba mapang Narendra Modi aser Amit Shah nati aniba sorkari ketdang mesütetba sayur, ta Congress interim president Sonia Gandhi-i senden nung ashi.
“Jamia, BHU, Allahabad University aser AMU nung inyakba sülen BJP-i tasa atonga JNU nung inyakba linüki nguogo. Modi-Shah sorkari ketdangsütsü aser nübortem kümzüka ayutsü makoker” ta laisa ashi.
Senden amenba sülen Congress lennir Rahul Gandhi-ia ashiba agi “linük indang rongsenkettsüng jenjang mejungi akümba nungi anientsü atema sorkari linük nung telemsa adokdaktsür.”
“Prime Minister Narendra Modi-i rejutem semdangang aser kaketshirtem den rongsenkettsüng jenjang aser mapa anguba onüktem jembiang” ta Rahul-isa ashi.
Tanü opposition telok 20-i anogo asem shimtet aser nübortem dang constitution kümzüka ayutsü atema item anogo timi amongtsü ayongzük.
Anogotemji- Netaji Subhash Chandra Bose indang tasoba anogo January 23, Republic Day January 26 aser Mahatma Gandhi asüba anogo January 30 lir.
Iba senden nung NCP tanishisang Sharad Pawar, LJD tanishisang Sharad Yadav, Left lennirtem Sitaram Yechury aser D Raja, Congress lennirtem- Rahul Gandhi, Ghulam Nabi Azad, Ahmed Patel aser taoba prime minister Manmohan Singh nungertem aden.
Ajisüaka, iba senden nung BSP, AAP, TMC, aser DMK teloktembo maden. Külen, AAP aser Shiv Sena-i parnok jaokba shidi mangu ta metetdaktsü.