Tamangertem reshikangshiba

Alima nung nisungtemi amangba yimsü ajungai temeim mapa inyaktsü aser sür külen pei tanüla anisüngzüka tepeladak alitsü indang sayur, anungji tamangba yimsü balala süaka tamangba yimsü tenüng nung kati ka reshikangshitsübaji madoker. Ajisüaka, alima aika nung tamangba yimsü balala amangertem rongnung meputep adoka reshikangshiteper aser item rongnung tanga yimsü amangertemi Khristan-tem reshikangshiba timtem ya tesashiba asütsü. Atangji, alima nung Khristan-tem reshikangshiba yabo tanü tasen masü saka Yisu alima nungi pilar külen tenyartem mapang Yisu nütsüngtem reshikangshia südaktsüba nungi tenzüka tanü tashi alima tesem balala nung Yisu dak amangertemi timtem agütsüba agi masü saka temeim mapa inyakba ajanga reshikangshiba mapatem atalokdagi. Ajisüaka, Khristan yimsü nung tesüngmangtsü kaji, reshikangshiba agidang Khristan yimsübo ayimasünga aoba angur. India nunga Khristan-temi dang kaketreju aser mozü ki tajung lapoka temeim agi kecha memeteti aliba nübortem nüchi kümdaktsür aser temang shi nunga taneptsü agütsür. Tanü India nung yimsüsürtem rongnung teimbaka Khristan-temi lapokba school aser University nung züngtetba purtem lir. Ibaji dang masü saka ashiko, parnok aika Khristantemi lapokba mozü kidang taneptsü anguba purtema alitsü. Khristan purtem dak tajung kaji parnoki lapokba kaketreju nung azüngba agi Khristan akümtsüla ta masü mesüra parnoki lapokba mozü kidangbo Khristan purtem dang anepalutsü ta masü saka tamangba yimsü kecha tebendang mali shibai tashitemetet kümner aser shibai taneptsü aginer, parnok ajak asoshi Khristantemi lapokba kaketreju aser mozü kitemji lir. Ajisüaka, India nung yimsüsürtem aikati Khristan-temi senotsü agi mesüzüka Khristan kümdaktsür ta bilemer. Ajisüaka, kechikodaser tanüla kümzüktsü asoshi sen meshitsü ? Komaser kotaki atutsü atema sen agi mesüzüktsü ? Khristan-temi inyakba mapa yabo kangshia masü aser amokmerena masü saka temeim agi nisung shinga tanüla mesamadaktsünüba agi Tsüngrem temeim osang tajung angatetdaktsütsü merangba mapa lir. Tang tashi nung kecha lima nunga Khristantemi tangar limapurtem Khristan makümba agi reshikangshiba otsübo mangashi. Atangji, tang India nung Citizenship Amendment Bill aser Act indang jembidang, India den kidangersa aliba linük Pakistan, Afghanistan aser Bangladesh nung Khristantem dang masü Hindu nunger dena reshikangshiba osang asenoki angashir. Iba jagi item limatem nung Muslim nungertemi tanga yimsü amangertem reshikangshiba metizüktet aruagi 2014 küm nungi India nung jenoka alirtem India senso kümdaktsüner. Tangbo itemji Citizenship Amendment Act (CAA) ajanga India senso kümtettsü. Atangji, tamangba yimsü tenüng nung reshikangshibaji Khristan aser Hindu nungertem dang masü saka Sri Lanka aser Myanmar ama limatem nungbo Muslim nungertema reshikangshi tia ajuruba asenoki angur aser angashir. Item Muslim nungertemji yutsür tanga yimsü amangertem asoshi dang senso akümtsü lenmang lapoktsübaji jakdaka pei ajung asaa inyakba mapa ka asütsü. India temzüng nungbo linük nung pei amangnüba tamangba yimsü amangtsü aser sayutsü temeten agüja lir saka iba temetenji alemdanga shinga tamangba yimsü memelentsü ozüng lateta lir. Iba ozüng jagi, talisa, Khristantem timtem lendong ajurur. Tang CAA ozüng latetba nung, Pakistan, Afghanistan aser Bangladesh nung reshikangshi ajuruba agi melitet arua India nung jenoka alir Khristantem nema senso temeten agütsütsü lateta lir. Ajisüaka, tebilemdangtsü kaji, reshikangshi maremtet bendanglen nungi aruba nisung ka nem reshikangshi alidak senso temeten agüja lidaktsütsübaji mulung anisüngzüka alitsüba mapa kabo masütsü. Tanga Karnataka state nung Khristantemi Yisu kürakyanglu ka yanglutsü tenzükba mapa anema kanga sashia apusodagi. Iba ama lima ka nung Pakistan, Afghanistan aser Bangladesh nung reshikangshi ajurur Khristantem nem senso agüja lidaktsütsü ta asüba ozüngji tamamangtsüka lir.