Dimapur District Task Force senden menogo

Dimapur, Aenjeti/January 14 (TYO): January 19, 2020 nü Intensified Pulse Polio Immunization programme aser February 10, 2020 nü National Deworming Day agitsü aliba dak ajemdaker IPPI, NDD aser WIFS dak sendakba nung January 14, 2020 nü DC Dimapur, Anoop Khinchi lenisüba kübok DC conference hall nung District Task Force senden ka menogo.
Senden nung DPO, Dr. Rebecca-i, sentepa aliba nüburtem dang IPPI indang nükjidong metetdaktsüba den ashiba agi, January 19 nü district ajunga nung Polio booth 519 amenoker polio agütsütsü aser tanur shirnok iba anogo booth-i marutet, parnok immunize sütsütsü asoshi anogo 2-3 ki nungi ki semdanga aotsü.
Laisa, iba sentong kübok ayimjema inyaktsü asoshi nükjidong yur aliba tanurtem ajak tongtettsü asoshi bendanglen nungi arua alir tejangjatem, lisopurtem aser railway station, bus terminus aser taxi stand nunger amala transit point tem ayimjema inyaktsü, ta ashi. Maneni lai, National Deworming Day dak sendakba nung PowerPoint presentation ka agütsü aser iba sentong nükjidong, shirnok dak rangloker inyaker aser koda inyaka aotsü iba indang metetdaktsü.
Senden nung Project Officer, UNDP, R.Khartu Monsang-i, Electronic Vaccine Intelligence Network aser cold chain maintenance indang metetdaktsü.
Kasa mapang nung DC-i item sentongtem dak sendaka aliba ketdangser ajak dang pei nem lemzüktsüba mapa takok ngua inyakyonga aotsü atema bendanga agüja inyaktsü mepeshia liasü, ta ketdangser sangdong ka ajanga metetdaktsü.