Tuensang nung Poanglüm mini Hornbill tenzükogo

January 13, 2020 nü Loyim Memorial Ground, Tuensang nung Chang Khulei Setshang Tiri Poanglüm Mini Hornbill nung o jembiba angur.

Dimapur, January 14 (TYO): Tuensang nung aliba Loyem Memorial Ground nung Poanglüm mini Hornbill tenzükogo. Iba benjung ya ‘Waza’ omen nung ajemdaker January 13 nungi 15, 2020 tashi amongtsü.
Benjung tenzükba anogo nung fest patron ji OSD to Chief Minister of Nagaland Denseih, Lima Onen Chang liasü aser Chang Khulei Setshang (CKS) Tiri host aser Tuensang DC Kumar Ramnikanth, IAS-i co-host ama shilem agia liasü.
Iba sentong nung district administration ketdangsertem, DIG 7 Sector Assam Rifles, Head GB, Tuensang district aser lennir aika aden.
“Nagaland nung mini hornbill amongtsü shisatetba ya Chief Minister Neiphiu Rio lir aser iba atema pa nem tenüngsang agütsür. Maneni, CKS aser organising committee dang pelar,” ta Lima Onen Chang-i o jembidang ashi.
“Tang nungi tenzüka, asenoki yangluba ki nung asenoki ola adoktsü, asen tsüngsangtem aser tasütait nokinketer tanüla sayutsü. Akhidang asen oboula nungertemi shinga dak teimla meyui, tanga kintem den külemi benjung monga aru” ta paisa ashi.
“Tuensang jila nung Chang nunger kilen 4078 aser nütsüng yongsük 25,000 nungi 30,000 shi lir. Ano, jila nung dokan kibur 1500 dak tema aliba nungi local entrepreneurs teimba lir. Saka, dokan nung ayokba ajunga amai tangalen nungi ang bener arua ayoker, aser iba atema asenoki shisadangtsü nüngdak” ta Onen Chang-isa shisem.
Paisa competitive exams agütsütsüpurtem dang ajangshitsü atema dang masü saka takok angutsü aser Chang nunger nem konang bentsür arutsü atema süoki ia merangtsü ayongzük.
Iba benjung lapokba shilemji Hd. GB, Tuensang town Khoni Ashem aser Pastor, TTBL Rev. H. Sangkap nati ketdangsüa agi.
Anüngdang agiba sentong nung K/Khel, Tuensang village, Kejok Union Tuensang Town, Yangpi Sao Thangjam Tuensang Town, Chingmei Mütli Thangjam Tuensang Town, Konya Union Tuensang Town aser Yimchunger Cultural Troupe teloktemi yartsüngsang balala ia sayu.