CM Rio-i USSC mungdang nung aden

Dimapur, January 15 (TYO): January 15, 2020 nü Kiphire district kübok Seyochung yimtsüng nung United Sangtam Students Conference indang 72 buba general session tenzükogo.
Iba sentong nung Chief Minister Neiphiu Rio-i tetushi süa jaoker ka ama shilem agi aser USSC wako atsükettsü.
Loktiliba ka renloktsü atema yimjung, azükaru aser tepela nüngdaker anungji kaketshirtem tsüngda telongjem alitsü nüngdaker, ta CM Rio-i ayongzük.
Shisaliok maliba tanur kaji tashikang maliba ozü ka ama lir anungji lanurtemi shisaliok angazüktsü atema kanga merangtsüla ta paisa ashi.
Rio-i Sangtam students union tenzükertem nem tenüngsang agüja jembidang “parnoki bendanga agüja inyakba ajanga ya tashi anir aruogo. Bendanga agüja tenzükba ajanga loktiliba nung teti telongjem adokdaktsür” ta ashi.
State-i temoatsü talila angutsü atema kaketshirtemi Tsüngrem akhüm tsübutsüla. Lanurtem ya tarutsü lennirtem lir, anungji loktiliba nung temelenshi adokdaktsütsü atema tongti shilem agitsüla, ta paisa ayongzük.
Chief Minister Rio-isa kaketshirtem dang saisapongba nunga temulung agütsütsü aser wadang ka ama kümdaktsütsü ayongzük.
Tanü Deputy Chief Minister Y. Patton, Forest Environment & Climate Change Minister C.M. Chang, Soil & Water Conservation Geology & Mining Minister Kashiho Sangtam nungertemi Chief Minister meina iba sentong nung aden.