Chief Secretary-i AHOD/HODs ajungshir; Mapai marur nem itasen magütsütsü tuyur

Kohima, January 15 (TYO): Benjung sodi tembanger hopta ana tashi süia aruaka sorkar office nung mapa inyaker kanga ajema lir, anungji tashi mangaba mapa inyakertem dak ‘No Work, No Pay’ inyaktsüla ta Nagaland Chief Secretary, Temjen Toy-i tetuyuba agütsüogo.
Bodbarnü Secretariat Conference Hall nung Administrative Head of Departments aser Heads of Directorates (AHOD/HODs) indang mezüng senden amendang pai iba tetuyuba agütsü.
Office lapoker hopta ana shi süia aruaka sorkar ketdangser aika office-i marur, ta Chief Secretary-i ashi.
Nagaland sorkari küm shia December 23 nungi January 1 tashi sorkar office ajak atema benjung sodi agütsür.
“Tongti ketdangsertem dak tebilemtsü keta lir aser asenoki tashi mangara, asen kübok inyakertemi mapai arutsüba mesüra mapang shitak amshitsü meimlatsüla” ta pai ketdangsertem dang ashi.
“Office-i arunü dang arutsü, marunü dang marutsü ta asüba tangatetba ajanga kodaser asenoki nübor tenzüktettsü. Iba atema sorkar office ajak nung casual leave account jungjunga rizünga ayutsüla. Iba mapa ya Secretariat nungi tenzüker district aser sub divisional office ajak nung inyaktsüla,” ta Temjen Toy-isa ashi.
“Asenoki telatetbatem kübok manidakra, asen tarutsü tamajung asütsü. Sorkari mapa inyakertem parnok temaba jenjang nung lir ama bilemer aser asenok nem tebilemtsü agüja aliba madak asenok temaba ta bilemer,” ta paisa sasaba olen ka ashi.
“Tongti ketdangsertemi tatishitsü tamajung sayur nung kodaser parnok kübok inyakertem dang tashi angang ta shitettsü? Sorkar office tem nung tang inyakba ya reprangdangra, pei sasa public tenzüker ta ajatsübaji taaktsüka lir” ta Chief Secretary-isa shisem.
Paisa department ajak dang ‘No Work, No Pay’ inyaktsü tetuyuba agütsü.
Temjen Toy-isa office tem nung metsümeshidak kanga mejungi aliba indang olen ka jembi.
“Iba ajanga public property atema temulung magütsüba sayur. Sorkar ketdangsertemi ozüng sülen anidaktsüka, saka iba ya mangur” ta paisa shisem.
Tanü sentong nung Chief Secretary-i o tesashi jembiba atema tatok meshi saka iba ya sorkar maparen nung tatalokbatem indang jembir, ta ashi.