AKM Süngsashir

Khar yimti nung yasüng nungi Ao Kaketshir Mungdang 68 buba lokti senden sentong  “Süngsashidi” ta asüba omen nung amendaker tenzükogo. AKM lokti senden sentong yanglurtemi ashiba agi, “Süngsashidi ta asüba ojang ya alu, ali wadang aser khuret, tongshi tulu abendang wadang tembangtsü aser alizüng atongtsü asoshi tanaben tashi tasen nung asentenshia apusotsü mapang ‘Süngsashir’ apusodi ta jembiba o lir. Ano, khen khen wadang balala inyakba mapang tom nung tezüdang ajurudang, tashi züklaa akümdang aser tamakok angudang asentenshia tashi tasen agishir apusotsü asoshi süngsashidi ta ajungshitepa jembiteper. Tzüyokdanga arr asettsü asoshi süng laa arr nangdena inyakyim ajak abensaa renema yur ok adena ola agüja washia süngsashir arr seta tenzüker. Ibai ok adena washia ola agütsüba, yimkong mungdang süngsama nung asentenshia tashi taitba nung lemtetbatem ajakji süngsashiba yimya lir.” Atangji, asenok aika asoshi Süngsashidi ta asüba ojang ya tasen ka asütsüa akok, anungji tangang AKM sentong yanglurtemi rasaa ashiba nungji Süngsashiba tetezüji ‘Asentenshiba’ aser ‘Tashi itshiba’ ta angatetogo. Tanü Naga nungertem rongnung talisa asenok Aotsür Aortem süngsashitsü nüngdakba tesemtem reprangdangra, zünger mezüngma, libaliro maparen ajak nung asüngsashitsü nüngdakba reprangtettsü. Item asüngsashitsü nüngdakba tesemtem rongnung, tang AKM lokti senden nung shisalemsateptsü asoshi rongsen bushiba maparen aser Ao oshi sapua jembitsüba nüngdakba onük ana ya shimteta lir. Atangji, tanü putu ya rongsen bushiba aser poktetdaktsüba mapang lir. Ibayongji, asenoki taoba putu nung pei bok asüngtsü indang jembiba amato masü saka tanü putu nungbo peisasa pei tashi, temetetba aser shisatsü agi nübortem nüngdak reprangteta, item nüngdakji bushiteta agütsütsü merangteper. Ibai tsürabur sen ajak agima agia zünger government ita sen tilaka chia alitsü kisüng bilemba putu masü saka nübortem nem government-i magütsütetba nüngdaktem bushiteta mesüra yangluteta agütsütsüba putu lir. Tanü putu yabo na kechi inyaker ta asüba putu masü saka nai kechi züsentetter mesüra kechi yanglutetter ta asüba putu ka nung asenok talangka liadokogo. Iba putu nungbo na koba tashi azüng ta asüba putu masü saka nai kechi metet aser kechi inyaktetter ta asüba putu lir.  Tanü putu yabo certificate agi masü saka pei kolok nungi adokba aser pei teka agi inyaktetba agi takoker taküm ka küma lia aoba putu lir. Iba ama putu ka nung asenoki asenok nüngdakba mapatem reprangtettsüla aser iba mapaji inyaktsü jangratsüla. Asen lima nung akaba süng, long aser süngolio ajak ya Tsüngremi nübortem nüngdak nung tagitsü küma amshitsü atema poktetdaktsüba rongsentem lir. Tia junga ka, tanü putu nung plastic mamshitsü ozüng küma latetter süra jet ta asenoki asen lima arem nung akaba rongsentem agi item plastic osettem melentsü lenmang bushitetra, ibajia rongsenren nung süngsashiba mapa ka asütsü. Iba amaji zünger mapa mangur ta tezüdanga mekazüi aonsutsü aser süngjanglijang züsentetba, shiruru metsüba aser item jagi chiyongtsü yanglua ayokba mapatem lanurtemi tenzüka inyakra, ibaji asenok rongsen bushiba lenmang nung asüngsangshir asütsü. Iba amaji asüngsashir inyakba jagi asen peri dang masü saka asenoki tangar nüngdaka peridaktsütettsü. Aji oda, rongsen bushiba mapa nung tashi itshia süngsashitsü atema South Korea nung Cannan lu ayimertemi ayimba ama, mapa inyakerang chiyongtsü aser mapa inyaktsü atema chiyonger ta chiyong shia asenokia pei mulungjang nung dang masü tebang nungia ola adoka ayimtsüla. Mapa inyaktsüba nung asenok asüngsashi nungang asenok alima nung senso tajung ka ama nümadanga alitsü aser asenok tangar dang teyari meshir masü saka teyari agütsür asütsü. Atangji, mapa aser o na külemi aoer, anungji peisasa mapa bushiteta asüngsashiba den külemi pei tetsü oshi akümketdakja asenoki jembitsü, zülutsü, azüngtsü aser ken tajung mejema atentsü tenzükra asen lima aser asen nübortem topur jungjunga asüngtettsü. Iba jagiang ajaki Aor dang masü saka Ao oshi dena saputsü.