AKM 68 buba lokti senden tenzükogo

Minister Temjen Imna Along-i 68 buba AKM lokti mungdang lapoktsüba angur.

Khar yim, Jan 15 (TYO): Ajaki yongya ataba ama Ao Kaketshir Mungdang (AKM) 68 buba lokti senden Jan 15 aonung nungi “Süngsashidi” omen dak rangloker yangi Khar yimdak meraketa tenzükogo. Iba mungdang nung AKM kübok unit aser sub-unit balala nungi tejaoker kaketshir meyi ana dak tali arua shilem agia mungdaki.
Nagaland Higher and Technical Education and Tribal Affairs, Minister, Temjen Imna Alongi iba mungdang lapokja jembidang, iba ama mungdang tulu ayonger tajangzük kecha mungura ajakji amajok dang asütsü, anungji, küm tasen nung tangazükba tasen kar angazüka bener aotsü asoshi kaketshirtem ayongzük. Paisa kaketshirtem dang tasü itta Tsüngrem akhümtsübua alitsü asoshi ajungshia liasü.
Kaketshirtemji asen nüburtem asoshi rongsen tulu lir, aji saka, asümesen aser taküm raksatsüsa lenmang tezülen jajara, tarutsü Naga nunger tiaji sadema mangur, anungji, asen jakdang aliba tayongzükba tapu balalatem nungi koktettsüsa tajungren bilema mera agira, tarutsü Naga nunger nüklaji nenok asütsü, ta paisa tayongzükba agütsü. Temjen Imna Alongisa 68 buba AKM lokti mungdang nüngtem adokba nüngo kaket ka sayatsü.
Iba sentong nung Treasuries & Accounts, National Highways Nagaland, Advisor Dr. Longrineken, MLA Moatoshi, Mokokchung D.C Limawabang Jamir parnokia tayongzükba o tulu bener arua mungdangsanger ayongzüka liasü.
January 16 nü sentong ana lir; kaji anepdang 9:30 ako nungi tenzüktsü aser iba sentong nung Nagaland Agriculture & Co-operation Minister, G. Kaito Aye tetushi tesemdanger asütsü jaoka lir. Iba sülenji nikongdang shisatokden sentong ka lir aser yangji shisalen sayur Prof. B. Kilangla Jamir, Tsükti Longkumer, Imtisunep Longchar parnoki “Rongsen tajangzük luyim nung yaretba asoshi koma süngsashitsüla” onük nung ajemdaker jembitsü. Aonung 6:00 ako nungi tenzüka “Benjungang Kaketshirtem” ta sür kentenmenü sentong ka akatsü renema lir. Iba mungdang ya Jan 17 tashi akatsü.