Mapa Inyaktsü Mejangrar

2020 küm sorkar tongti ketdangsertem mezüngbuba senden nung Nagaland Chief Secretary, Temjen Toy-i benjung mongpu sodi tembanger hopta ana jungnüaka sorkar office nung inyakertem aika mapai maruba osang metetdaktsübaji tejashitsü osang ka lir. Iba senden nungji pai mapai marurtem anema ‘No Work, No Pay’ inyaktsü tuyuogo. Sorkar mapa inyakbaji itasen agia alitsü atema dangbo masü saka nübur tenzüktsü atema lir, ajisüaka ibaji junga mangatetba ajanga mapai aotsü mejangrar. Atangji CS-i ashi ama asen lima sorkar office tem nung tang inyakba jenjang ya reprangdangra, pei sasa ‘public tenzüker’ ta ashibaji taaktsüka lir. Küm 3-4 tejaklen Secretariat aser Department balala nung Biometric Attendance System amshitsü atema jembibatu osangtajung ka asütsü, kechiyong iba system tenzükerbo mapai maotsüjibo yutsür office-ia mapang shidak nung oa nüburtem tajungtiba nung tenzüktsü ta imlaa liasü, saka tanep osangkakettem nung sorkar mapa inyakertem mapai maoba osang angashia aika jashir alitsü südi. Nagaland sorkar office nung ketdangsertem nungi tenzüker tilaba tashi karbo ita nungi ita, küm nungi küm songtema mapai moi itasen agirtem lir. Yamaji mapa maoba ajanga nüburtemi takoksa ajurur, kechiyong anogoshia yimtsüngtem nungi office nüngdak balala atema nübo aser rongsen jenti indoka jilai oa amonger, saka office nung inyakertem mapang shitak nung majurur. Sorkar Service Rules nung sorkar mapa inyaker ajak mapang shitak amshia mapai aotsü aser nendaka inyaktsü lateta lir. Tanü Nagaland nung sorkar mapa bushir jenti lir, saka mapa ngur sülenbo office-i maortema lir. Kar Kohima, Dimapur mesüra Mokokchung jilatem nung dang linüba agi pei mapa lemzüktsüba tesemi maor, kar pei kibong den külemi linüba agi mapai maor, kar azümesenba agi mapai maor, ano kuli balala aika alitsü südi. Akhidang asen otsüla-oboula nungeri alu wadang temer benjung among, saka benjung mongtemba sülenbo atapisüa mekazüi asentenshir tejangraba tulu nung alu wadang nung meranga nokdak, yamaji par sobaliba tajungji tanü asenokia benshitsüla. Sorkar mapa ngur itasen tajung chia pei nüngdak periba den kibong mesütsü atema dangbo sorkar mapa mebushitsüla, saka nübur tajungtiba nung tenzüktsü melungsentsü agi sorkar mapa bushira ibaji ajanga pei dang masü saka ajak ajangzüktsü. Sorkar mapa angubaji maongka tulur, kechiyong nisung aika rongnungi kari dang iba maongka angur. Joko benjung mongpu süiogo anungji taküma anema lia benjongmong meraketa amongtsüsa asenok ajaki pei pei wadang nung kümkümshir nokdaktsüla.