Mokokchung DC-i metetdaktsür

Dimapur, Aenjeti/January 16 (TYO): Mokokchung Deputy Commissioner Limawapang Jamir NCS-i sangdong ka ajanga Ungma yimtsüng, Mokokchung yimtsüng, Chuchuyimpang yimtsüng aser Khensa yimtsüng GBs og aser Mokokchung jila GBs og aser kiyong 18 nung ketdangsertem aser nüburtem ajak dang January 26 nü Republic Day benjungmung teti ama 8:45 nung Imkongmeren Sports Complex, Mokokchung nung tenzüktsü ta metetdaktsüogo.
Anungji iba sentong dak sendaka aliba aser Mokokchung jila nung aliba nüburtem ajak dang sentong nung arua adentsü metetdaktsür, ta DC-i metetdaktsü.
Kasa mapang nung Mokokchung Deputy Commissioner-isa Mokokchung jila kübok sorkar mapa nung tenzükertem ajak dang January 26 nü Republic Day sentong Imkongmeren Sports Complex, Mokokchung nung anepdang 8:45 ako nungi tenzüktsü ta metetdaktsüogo. Anungji sorkar tenzüker ajak dang sentong nung tamakok maludaktsüi arua adentsü metetdaktsüogo.
Maneni District Head of Offices tem dang sentong nung adener pei staff tem tenüng bendena office nung benoktsü metetdaktsüogo, koba jenjang tapet agitsü asoshi sorkar dangi abentsü, ta Limwapang Jamir-i sangdong ka ajanga metetdaktsü.