Tanü Amit Shah-i NE nung party balala nungi lenirtem ajurutsü

Agartala/New Delhi, January 16 (Agencies): Hokolbarnü New Delhi nung Union Home Minister, Amit Shah-i Citizenship Amendment Act (CAA) dak sendakba nung Northeast state tem nung aliba tribal party tem nungi lenirtem ajurutsü; item party rongnung BJP den teloktep party- Indigenous Peoples Front of Tripura (IPFT) densema lir.
IPFT-i ita ka sülen maneni CAA anema longkak aita atenzükogo. Parnoki anogo 11buba Tripura Tribal Areas Autonomous District Council (TTAADC) indang headquarters,
Khumulwng nung mener longkak aiter.
Shillong nung osangbenertem den jembidang Meghalaya Chief Minister, Conrad K. Sangma-i, pa leniba nung Meghalaya Democratic Alliance (MDA) nungi lenirtemi Shah ajurua state nung tanüngba tesemtem nunga inner line permit (ILP) inyakayim benoktsü atema mepishitsü, ta metetdaktsü.
December 19, 2020 nü Meghalaya Assembly nung bangzüng ka renema Centre dang ILP binyakyim benoktsü atema takhangba agütsü.
Brihostiabarnü osangbener den jembidang JMACAB lenir aser Indigenous Nationalist Party of Tripura (INPT) General Secretary, Jagadhish Debbarma-i, “Tesüiba anogo ishika onok Delhi nung mongdar, saka Home Minister Delhi adener tangalen jelia sentong aliba ajanga tang tashi pa majuru. Hokolbarnü pa den senden amentsü,” ta metetdaktsü.
Amit Shah ajurua senden amentsü atema IPFT party tongti, Narendra Chandra Debbarma aser General Secretary Mevar Kumar Jamatia na leniba nung party nungi parnok pezü tanü Delhi-i apusoa ogo. Tripura nung Debbarma ya Revenue & Fisheries Minister lir aser Jamatia ya Tribal Welfare & Forest Minister lir.