Mokokchung nung District Task Force senden agiogo

Dimapur, Aenjeti/Janaury 17, 2020 (TYO): Mokokchung Deputy Commissioner indang office nung January 15, 2020 nü IPPI (Intensified Pulse Polio Immunization) dak sendakba nung District Task Force senden ka ayongzüka agiogo. Iba senden nung Limawabang Jamir NCS, Deputy Commissioner menden liasü, ta sangdong ka ajanga metetdaktsü.
Chief Medical Office Mokokchung sangdong ka nung ajemdaker, Dr. Ayangla Saku DPO (RCH&UIP)-i IPPI indang tatsü agi rasa ashi, kong Poliomyelitis, Polio virus indang lendongbang aser OPV kübok achaayangba maparen balala indang nübur dang kümdangshidaktsütsü atema densema lir.
Taoba IPPI maparen nung shilem 98 ayimjema ajangzüktetba atema Dr. Ayangla-i pelaba metetdaktsü aser District (Mokchung) nung immunization atema nükla/nükjidong ayuba dak sendakba onüktem nung ajemdaker o lemtepa liasü.
Laisa, January 19, 2020 (Deobar) nü Mokokchung district kübok tesem ajunga nung polio booth 205 amenoktsü aser iba anogo nung polio mejemi alir kinü tanurtem atema January 20 aser 21, 2020 nü tsüngdong oagi polio jemdaktsütsü asoshi maparen achaayanga inyaktsü, ta metetdakja liasü.
Immunization sentong takok ngua bener aotsü atema, DPO (RCH&UIP)-i CDPO dang Anganwadi nung inyakertem nem peipei tesem nung iba maparen nung yaritsü metetdakja liasü.
Senden nung, DC-i tanur ajak nem polio jemdaktsütsü atema ozüng ka ama inyaktsü metetdaktsü.
Dr Kibangkumba Dy.CMO-i, NDD mapang school nung tesayurtem aser Health workers matsüngdang De worming mozü süngjangtem achaayanga lema agütsütsü aser chidaktsütsü asoshi tetuyuba agüja liasü.
Maneni, Dr. Chubala Aier CMO-i, iba senden nung Department balala aser tongtibang nisungtem aruagi adenba asoshi pelaba metetdaktsü aser taruba maparen ajak nung maneni longjema aser amalitepa inyaka aotsü asoshi mepishia liasü.