Nagaland-i CAA magizüker

Linük ajungalen Citizenship (Amendment) Act anema ola adoka arur aser state aika nung telok balalai CAA anema lungkak aitba sentong balala agiyonga arudar. Telok aikati Centre dang iba ozüng meyipa agitsü atema takhangba agütsür aser talisa iba Act anema Supreme Court nunga ken o aika benoka lir. India kübok state tem rongnung mezüng Kerala sorkari aser yashi Punjab sorkari SC nung CAA anema ken o tem benokogo. Citizenship (Amendment) Act ya tamangba yimsü nung ajemdaker yanglu aser iba yong jiang India nung senso aikati iba Act anema ola adoker. Tarutsü nung iba Act ajanga linük aser state tem asoshi timtem bentsür arutsü ta tsübuba agi nisungtemi magizüker. Talisa Northeast state tem nung alirtemi iba act magizüker aser yaküm Parliament nung CAB benokba sülen nungi tanü tashi NE nung telok aser nisung aikati iba ozüng anema ola adokyonga arudar. Yaküm December ita Parliament nung CAB benoka agizükba sülen Citizenship (Amendment) Act ta melen aser January 10, 2020 nungi joko iba Act mapa küma inyakba osang sangdongogo. Ajisüaka, CAA anemertemi sorkar dang iba Act meyipa agiang ta takhangba agüja arur aser SC-ia iba Act anema obendang ka agüjang nübortemi yongyaseta atar. Yaküm nungi linük nung aser talisa Northeast nung alirtemi CAA anema ola adoka arudang, Nagaland nungi Member of Parliament anaprongi iba Act pusema vote enoktsü aser iba jagi külem NE state balala nung alirtem temulung yirutsü. MP anaji Nagaland tenüng nungi Parliament nung teshimtet nübotem asü nung, tangartemibo Naga nunger ajaki CAA agizüker ama bilem aser social media sabang balala nung tangartemi asenok Naga nunger dang mepelaba mesüra aitsüba osangtem prokshia liasü. North East Students’ Organisation (NESO) kübok Naga Students’ Federation (NSF)-i yaküm December ita CAA anema mokdang ayonga amongba dak alaka, Assam nung ama Nagaland nung teloktemi ola kecha balaka madoki mesüra sentongtem ayonga magii aruba mapang ka nung, ‘Nagaland Against CAA’ ta ser online telok kati CAA anema lokti sentong ayonga agitsü osang sangoktsübaji tepelatsü osang ka lir. Atangji, CAA ya asenok Naga nunger atemaa majung aser tarutsü nung iba Act ajanga asenok nem timtem aser lendong bentsür arutsü. Naga nunger lennir aser shisashir aikati asenok Arrla 371 (A) aser ILP ozüng ajanga kümzüka lir ta jembir saka Arrla 370 agientetba sorkar atemabo, Arrla 371 (A) aser ILP agientsübaji zübazübar asütsü. Anungji, tanga state temji yutsür, külem North East state tem nung nübortemi CAA magizüker ta ola adokba aser lungkak aita sayuba amaji, Naga nungeria adoktsüla aser sayutsü tim. Osang angazükba agi ‘Nagaland Against CAA’ ta asüba online telok ya taküm January 6 nü tentetba lir aser iba telok ya Facebook nung lir. Iba osang zülu tashi nung iba telok nung züngsem meyirjang 20 shi aliba nguogo aser parnoki tanü (January 18) Dimapur kübok Supermarket Area nung timi lungkak aitba sentong ka agitsü ayonga lir. Iba sentong ya Supermarket Area nung The Garden anasa anepdang 10:00 ako nungi nikongtsütsü 4:00 ako tashi agitsü. Anungji, Dimapur nung aliba Naga sensotemia CAA magizüker ta sayutsü atema iba sentong nung oa adentsü ayongzüker. Maneni, tarutsü anogotem ‘Nagaland Against CAA’ mesüra tanga teloktemi CAA anemba sentong ayonga agira, Naga nungertemi longsolongsoa shilem agitsüla aser asenokia tamangba yimsü nung ajemdaker yangluba CAA magizüker ta sayutsüla.