Nagaland Assembly-i SC/ST Bill agizükogo

Kohima, January 17 (TYO): Hokolbarnü Nagaland Assembly-i Constitution 126th Amendment Bill, 2019 agizükogo.
Constitution indang 126th Amendment ji Scheduled Castes (SCs) aser Scheduled Tribes (STs) asoshi menden lemzüktsüba dak sendaka lir.
13 buba State Assembly indang session pungububa tenzükba anogo nung Chief Minister Neiphiu Rio-i Assembly resolution ka ama iba Bill agizüka liasü.
“Nagaland ya Constitution indang 126th Amendment nungi tajangzük angur rongnung ka lir, kechiyong Assembly menden 60 nungi 59 ji Nagaland nung Scheduled Tribes atema dang lemzükja lir. Anungji, Nagaland-ia iba Bill pusemtsübaji kanga tim,” ta tanü CM Rio-i ashi.
Dimapur ya 1979 küm ‘tribal belt’ ka ta sangoktsü saka Dimapur-I Assembly Constituency ya unreserved seat ka lir. Anungji, assembly-i iba menden atema ST reservation onük benoka jembi junger, ta Rio-isa ashi.
Meghalaya, Mizoram aser Outer Manipur nung Lok Sabha mendentem ST atema lemzükja lir saka Nagaland nungi LS mendenbo ‘reserved’ masü lir. Anungji, tarutsü nung Nagaland nung Dimapur-I Assembly menden aser Lok Sabha menden ya ‘ST reservation category’ kübok dendaktsütsü atema jembitsüla, ta paisa tebilemba ka lemsatep.
Mezüngbo, 13 buba Nagaland Legislative Assembly ya February 7 nungi budget session ama agitsüba sentong liasü, saka 125th Amendment Bill agizüktsü atema tanü nungi assembly session tenzükogo. Tanabuba session ji February 7 nung tenzüka agitsü.