68 buba AKM lokti senden takok ngua tembangogo

Noksa nung AKM ketdangpur tasen team tenangzükba agidang tangokba noksa nung angur.

Khar yim, Jan 17 (TYO): “Süngsashidi” omen dak rangloker Ao Kaketshir Mungdang (AKM) 68 buba lokti senden sentong Jan 15 nungi tenzüka anogo asem nü tashi yangi Khar yimtiba nung takok ngua mungogo. Iba sentong nung AKM kübok aliba unit aser sub-unit balala nungi mungdanger meyi ana dak tali arua aden.
Mungdang shibangtsür Nagaland Mechanical & Housing Minister, Wb. Tongpang Ozükümi jembidang, tangari Ao kin dang “mezüngpur aser lenir kin” ta jaloktsüba ya asenoki inyaktetba agi masü saka asen tsüraburtemi meranga inyaker alangzüktsüba mapa ka lir, saka “tesüiba konang nüngsang nung dang azüita aser jembia lira, asenok kodanga tejakleni maotsü, ta ashi.
Pei tetsü oshi mejembitetbaji konang kabo masü, saka tanü temeyoktep sobaliba ka nung alir asünung, tensa tia agi pei tetsü oshi mejembiteti küma aoba nüburtem aika lir, anungji, AKMi tetsü oshi wazüka ayutsü asoshi bangzüng tajung renema item nüburtem ajak ayimjema tongtettsü asoshi paisa ajungshi.
Tanü Ao Senden kübok Ao Senden Literature Board (ASLB)-i Ao oshioben aser kaketkeno wazüka ayuba maparen kanga meranga inyakdar, iba wadang nungji AKMia akokba tashi nungita yariteptsü asoshi paisa shisem.
Paisa kaketshirtem dang tetoktepba tatidang balala nung temulung agütsütsü atema olen ka shioktsüdang, Naga nunger joko küm 10 dak tali IAS madoker, anungji, iba luyim nung jangratsüla aser kadi ka ajungshiteptsüla, ta kaketshirtem ajungmeso.
AKMi adokba Ao Milen ya tejentiba osangkaket rongnung ka lir, iba ya Ao kin atema osangkaket ka dangbo masü saka “ibai Ao kin atema tesangwa milen ka lir”, iba atema asen tsürabur aikadi bendanga agütsüogo, “ya asenok atema senti oset ka lir”, anungji, ibai tajungtiba akümtsü asoshi Aor ajaki nungittsüla, ta paisa inyakdaktsünüba ka ashi.
Naga nunger loktisa teimba kümogo, lokti ajakji nükjidong tajung atema dang tentet saka lokti aika nükjidong nungi pilar tezüleni oatoker, yamaji AKM jia nükjidong nungi pilaa maotsü asoshi paisa tekümdangtsü ka ashi. Tanü alimai tasü tait lenir nungdaker, anungji, mendenpur shirnok arutsüba lir, mapa tajung inyaktsü merangang aser nenok mapang tsüngnep tajung yutsütsü asoshi paisa ayongzüka liasü.
Tanep shisalemsabang sentong ka nung “Ao oshi wazüka aser sabua benshitsü atema koma süngsashitsüla” ta asüba onük nung ajemdaker shisalen sayur; Nagaland University nung tesayur Dr. Pangersenla Walling aser Tir Yimyim yimozülur Wb. K. Temjen Jamir tenadi tagitsü aser teinyaktsü shisa rajem o aika bener arua mungdanger ayongzük.
Sentong balala nung Nagaland Directorate of Employment, Skill Development and Entrepreneurship, Addl. Director, Wb. Chiten Yaden, Central Nagaland Students’ Association (CNSA) tir Sb. Himato Yeptho aser Eastern Nagaland Students’ Federation (ENSF) tir Sb. Sepili Sangtam, 68 buba AKM planning committee convener Wb. S. Panger Ao, Khar local planning committee convener Wb. Apok Jamir, parnoki salem o den tepela o aser tayongzükba o balala bener arua lemsatep. Taruba 69 buba AKM lokti sendenji 2023 küm Akhoya yimdak amungtsü.
AKM bangzüng:
AKM 68 buba mungdang sangeri bangzüng 10 renema ayu aser item rongnung yangi kar agütsür; mezüngbuba nung, “Survival Mokokchung” wadang tali tejangjaba nung aser tajangzük ngua inyaka aotsü asoshi tetuyuba ka yanglutsü aser iba asoshi takutet luden ka shimtsü. Tanabuba nung, mezüng AKM nükjidong aser mangdang atalokja Mokokchung Law College jenjang tamabai ajungkettsü atema tekaratiba nung takutet luden ka shima tapet mapa inyaktsü lemtet.
Tasembuba nung, tangar dang nungi alakteta takok angur kaketshir nem akhüm agütsütsü aser parnok ajungshitsü nükjidong nung Aor kaketshir Class 10 aser 12 tatidang nung tamatiba jenjang nung takok tajung angur (Board/National toppers) nem tetushi agütsüba sentong AKMi ayonga akatsü. Pezübuba nung, Aor lanurtem aser kaketshirtem rongsen tajangzük luyimba nung süngsashitsü aser terenlok nung tejakleni aotsü nükjidong atalokdaktsütsü atema AKMi achaayanga “Aor Entrepreneur Forum” ka tentettsü lemtet.
Pungububa nung, Tuli Paper Mill shibangatoktsüsa tensa tia ajurur, anungji, iba paper mill amenoka aliba ali/kimung ajak AKMi tarutsü lanuasensor aser nübur arok tajangzük anguba mapa nung amshitettsüsa wazüka ayutsü bangdakpurtem den tongtepratepa inyaktsü lemtet.
Trokbuba nung, Ao oshioben aser kaketkeno süngsashia aser wazüka ayuba aser terenlok adokdaktsüba wadang nonger aotsü nükjidong nung küm tersüa (2020-2029) asalentong yanglua tapet mapa inyaktsü, aser tenetbubaji – 2004 küm AKM Platinum Jubilee Mangmetong nung amungdang lemteta aliba tanaben nenshia, Naga yimden nüchiso bushiba wadang nung nüchiso bushir telok ajaki Naga yimden telungjem asoshi inyaktsü aser telungjem ola ka asütsü ajungshir aser Naga yimden latet maparen nung AKMia akok tashi nungittsü, ta renema yuogo.
AKM ketdangpur tasen shimba:
AKM 2020-2023 kümsük atema item ketdangpurtem; tir – Sb. Nungdokyanger (Moayimti), tatong tir – Sb. Yimjungsunep (Mopungchuket), tongti zülur – Sb. Nekmi Longkumer (Aliba), repsem zülur – Kr. Nangjenkala Tzüdir (Yimchenkimong), Kaketkeno Zülur – Sb. Chubameren (Changdang), Saisapong Zülur – Sb. Moameren Pongen (Chuchuyimlang), Metetpela Zülur – Sb. Onenpong (Kinunger) aser Sobaliba Zülur – Sb. Longpozem Jamir (Longjang) nungertem shimtet.