Ungma nung “Chhau Parva” ta sür tsüng-sangba benjong ka amungtsü renemer

Mokokchung, Jan 23 (TYO): Ungma Village Council den yaritepa Sangeet Natak Akademi, New Delhi aser Chhau Kendra Chandankiyari Bokaro, Jharkhand nadi Jan 28 nungi tenzüka anogo asemnü tashi “Chhau Parva” ta sür benjong ka Ungma yimdak Babu Tzübu Amphitheatre nung ayongzüka lir, ta iba sentong achaayanger Ustad Bismillah Khan Yuva Puraskar (Akademi Award) angula aser Sangeet Natak Akademi North-East Adviser Committee nung züngsem, Supongsangla Jamiri Urban Hub Café nung osangbener senden ka nung metetdaktsü.
Anogo asem benjong nungji Odisha, Jharkhand aser West Bengal state-tem nungi nüngtugu artist telok balalai arua shilem agitsü sentong renema lir. Iba den külemi Jan 29 aser 30 nüji kentenmenü, jilushi aser tsüngsang balala dak sentakba onük nung ajemdaker kaketshirtem asoshi shisatokden sentong balaka anepdang 11:00 nungi nikong 1:00 ako tashi akatsü, ta lai ashi. Iba sentong ya angati dang asütsü aser jangratemtsü kaji tesem balala nungi arur atemabo taru-tao (transportation) renemtsütsü. Iba ya sentong tulu ka asünung, tejangrar ajak marendaki arua shilem agitsü ayongzüker, ta laisa shisem.
Jilushi, tsüngsang ken aser kongki tapu balala luyim tsütsü ya ngujem tulu, asenoki dang temulung agütsürbo National level tashi shilem agitettsüsa lenmang sadema lapoka lir. Anungji, lanurtemi iba luyim nung jangratsüla aser sorkaria iba dak sentakba nung maongka lapoktsütsüla, yamaji yimdak yimtsüng nunga putu yimsüsürtemi ajungshitsüla, ta laisa inyakdaktsünüba o ka ashi.
Tanü joko yim aika nung arju ya noksa amai dang yua lir, akhi arju nung kechisa inyaka liasü, item indangji nüngtugu kümdakja jilushi yanglutsü akok, Etiben o Jinaba indang otsü aser yamala mesükba Aor otsü olem aika lir, kodang asenoki item mapaji inyakdir, iba jagi asen sobaliba tali jangjatsü aser wazüka yutettsü, ta laisa ashi. Yamala wazüka ayutsü asoshi rizüng ayuba tesem ka North-East atema Tripura nung lapoka lir, ta laisa shisem.
Sangeet Natak Akademi, New Delhi ya Ministry of Culture, Govt. of India kübok mejameja tentetba nüngtugu riju ka lir. Iba ya national academy ka aser yangi kentenmenü (music), tsüngsang (dance) aser jilushi (drama) tesayuba balala agütsür.