Turnbull-i aniba Cabinet yimsüsürtemi yimsütsütsü tenangzükba agir

Melbourne, September 21 (Agencies): Australia Ato Kilonser tasenba, Malcolm Turnbull-i aniba Cabinet yimsüsürtemi yimtsütsü tenangzükba tanü Hombar nü agiogo.
Mezüngbuba tetsür defence minister, Marise Payne densema tetsür yimsüsür 5 tashi tanü yimsüsütsü tenangzükba agiba osang jangjaogo.
Australia Govenor-General, Peter Cosgrove-i tanü Canberra kübok Government House kilung nung arishi küm 60 tain Turnbull-i shimtetba Cabinet yimsüsürtem nem yimsütsütsü tenangzükbaji agüja liasü.
Taoba Australia Ato Kilonser, Tony Abbott-i aniba cabinet nung tetsür yimsüsür 2 dang liasü saka ibaji melenshia yimya tasen nung par linük anitsü nükjidong nung Turnbull-i par cabinet tasenba nung tetsür yimsüsür 5 tashi tan shimokba osang jangjaogo.
Australia madak yimsüsütsü tashi benokba Liberal Party yimtenren telok rong nung vote agiba sentong ka taoba hopta agiba sülen Turnbull-i Abbott den temaba jenjang ngua Ato Kilonser tasenba akümtsü maongka angu.
Ajisüaka, “Abbott-i yimsütsü menden abentsü memulungtsü,” ta shia, Turnbull-i tan tentetba cabinet tasenba nung Abbott nem menden melemzüktsüba osang jangjaogo.
Tanü agiba tenangzükba sentong nung Attorney-General, George Brandis-i Senate lenisang tasenba inyaktsü tenangzükba; Scott Morrison-i Finance Minister; Christian Porter-i Social Services Minister; Simon Birmingham-i Education Minister aser Josh Frydenberg-i Energy Minister inyaktsü tenangzükba agia liasü.