Kerala tsür ka dak Coronavirus putet

New Delhi, January 23 (Agencies): Saudi Arabia nung inyaker Kerala tsür nurse ka dak Coronavirus putetogo; iba wara agi China nungbo nisung 17 süogo, ta Brihostibarnü Junior Foreign Minister, V Muraleedharan-i metetdaktsü.
Muraleedharan -i twitter ajanga, “Kerala tsür timba ser India nunger nurse 100 shi Al-Hayat hospital nung inyaker; parnok ajak dang iba tashidak wara- Corona virus tendang saka nurse ka dak dang iba puatet. Nurse ji tang Aseer National Hospital nung yaridar aser tajungba kümdar. Ni Indian Consulate dang akokba tashi yaritsü amepishiogo,” ta metetdaktsü.
Ano külen Kerala Chief Minister, Pinarayi Vijayan-ia shidi ka ajanga External Affairs Minister, S Jaishankar dang Saudi Arabia linük dang la nem treatment tajungtiba agütsütsü atema mepishiang ta metetdaktsüogo.
Osang angazükba agi, Kerala tsür laji Kottayam district kübok Ettumanoor nungi lir aser lai iba tashidak keta alir Philippines tsür nurse ka yariba mapang nung iba tashidak menazük.
MEA-i China nungi arurtem dang airports nung iba tashidak ali-mali metettsü atema Thermal screening agitsü metetdaktsüogo.
“China nung alirtem kümzüka alitsü atema onoki inyakdar. Ajisüaka nenok India-i arutsüsa kümra (airports) nung screening agitsü,” ta MEA otongdar, Raveesh Kumar-i metetdaktsü.
Tang tashi nung India-i tayimtsü 43 nung India-i arur passenger 9,156 screening agiogo. Coronavirus wara poktetba sülen World Health Organisation (WHO)-i rongdak sendan ka ayongzüka menogo aser US nunga coronavirus tashidak putetogo.
China nungi India arurtem dak Chennai, Bengaluru, Hyderabad, Cochin, Delhi, Mumbai aser Kolkata nung aliba International Airports nung Thermal screening agidar.