Taoba Minister Vero asüba atema mangyimer: Chingwang Konyak

Kohima, January 24 (TYO): Tanep tembar tajung, Melhupra Vero ajungbena asüba atema mepelar, ta NDPP President, Chingwang Konyak-i sangdong ka ajanga metetdaktsü.
“1960s nung NNO mapang nungi küna külemi inyaksema aru aser tesülen Congress nunga külemi inyaksemogo. Lanur asüdang künati ajangshiba temenungratsü aika atalokogo aser nübur tenzüktsü atema tejangraba tulu liasü. Pa dak sasapela liasü, temeim aketba nisung ka aser loktiliba atema tenla agütsütsü melunga aliba nisung ka liasü,” ta kasa sangdong nung shia lir.
“Tanep pa asüba osang angashia kü melung züreper, kechiyong nija aser loktiliba nüngdak balala den yimtenren mapa aliba ajanga tawa küm ishika küna majurutepi liasü. Tawa pa shirangba mapang nunga ni pa den phone ajanga mejembitetba ajanga ano taliba ni mangyimer,” ta paisa lemsatep.
“Kü den külemi NDPP lenirtem aser züngsem ajaki mangyimer kibong den mangyim jashi lemsateper. Tsüngremi mangyimer nem tesünep agüjang ta sarasademtsür. Onokisa Tsüngremi pa agizüktsü aser asür tanela tesünep nung anisüngzüktsü atema sarasademtsür,” ta kasa sangdong ajanga lemsatep.