Kohima nung R-Day nü traffic ozüng melenshir

Kohima, January 24 (TYO): January 26, 2020 nü Secretariat Plaza, Kohima nung 71buba Republic Day anogomong nung security dak sendakba nung traffic ozüng tera melenshir, ta tanü PRO Kohima, Nagaland sangdong ajanga metetdaktsü.
CAR PASS ‘Z’ (Red) aser CAR PASS ‘Y’ (Blue) aliba garitem ang Secretariat Plaza telungi aitsü melatsü aser CAR PASS ‘X’ (Green) aliba garitemi peipei ketdangsertem Main Gate tashi meinoktsüba sülen Secretariat Complex kima nung ang anena ayutsü; car passes maliba garitem Secretariat Complex telungi aitsü memelatsü aser Assembly Secretariat road nung ang anena ayutsüla, ta sangdong nung shia lir.
January 26 nü anepdang 6:00 ako nungi R-Day sentong metembang tashi two wheelers densema gari kecha item lenmang nung anena mayutsüla: (a) Raj Bhavan nungi New Secretariat Complex tashi, (b) New CM official Residence, Phezoucha nungi New Secretariat Complex tashi aser (c) gari anena alibatem tetsükdaktsü majurutsü atema driver tem gari nungi mayazüktsüla, ta sangdong nung shia lir.
Iba anogomong sentong matem tashi Kohima jila nung gari tulutem senzütsü memelatsü aser anepdang 7:00 ako tashi nungbo jila nung khu oshizükba aser oshiketba tembanger alitsüla, ta kasa sangdong ajanga metetdaktsü.
Nüburtemi amaliteptsü imlar ajisüaka tashi mangaba garitem atsüer aotsü aser temenok senji gari kiburtemi agütsütsü.