Ano nisung maküm !

Asen limai Yisu Khrista osang tajung aruba aser asenok kaketshisatsü angazük tenzükba küm aser mapang apibo asenok joko küm 150 jungdi asür, anungji asenoki inyakba mapa ajak nung tangar nem asen ajungshidaktsütsüsa masü saka peisasa rajema yimkong asoshi mapa tajung inyaker nisungchi kaka kümer alitsüla. Ajisüaka, tang tashi nung asenok libaliro reprangdangra asenok ano nisungchi küma maruba jakla maparen aika nung reprangtetter. Item mapatem rongnung tang tejembidak mapa kaji Nagaland government office tematiba aser tulutiba, Chief Minister aser Chief Secretary nati anir nübortem asoshi mapa inyakdak, Nagaland Civil Secretariat, Kohima nung mapa inyakertem mapai maruba sobaliba tasen ka ya asütsü. Aiben asenoki asensasa asen sobaliba agi nümadangteta jembibaji mapa meranga inyakba aser ochishia aliba sobaliba ana ya lir. Ajisüaka, tanübo mapai maoba aser ochimashibajiang asen sobaliba kümogo. Akhi asen tsürabur sobaliba ajungba indang jembibaji mapa meranga meinyakba aser ochimashiba taküm yimyaji tangar tsüngdang maksü liasü, saka tanübo anogo shia mapang shitak nung office-i orr arurtemjiang menütsür aser ochishia inyakertemjiang yimten aser lokti asoshi dang masü saka arogo asoshia dena tagidak maka akümer. Naga nunger tazünger aser mazünger ajaki government mapa bushir saka shingaia mapa meinyakner. Iba jaklaji tebang agi komaka rasaa shitettsü ? Itemji nisung asü ? Mapai mao ser nung ita shia ita sen agizüker. Nübortem asoshibo kecha meinyaktsü ser nung nübortem tenzükba tenüng nung government senpongbo arema agir. Government mapa inyakertem dang mapai arung ta shijen ashiba tensa tia jagi asen lima tia sayur. Iba ama tia ka nung tangari Nagaland Civil Secretariat nung akaba file ajak agizüka bener aoyonga asenoki memetettsü. Goverment mapa tulu angu nungji, mapa koka yakta yakta nübortem asoshi mapa renemtsütsü atema gari dena agütsür saka item garitemji bener tulurtem pei juri nüngdak senzüba agi office-i mapang shitak nung marur, anungji tilartema maor. Aji oda, tang tashi asenok dang mapai marura ita sen magütsütsü ta shidaktsütsüsabo malitsü tim. Atangji, jepaka nüktsü malu, asenok dak nisung makümba jakla yimya ano aika keta lir. Asenok aliba kibo temerük, chiyongtsüa tajung achir, garia tajung nung dang mener jajar, neck tie dena süoshia tajung agir, saka asenok dang, tang tashi yangi metsü temetsü aser yangibo jana teindok ta ashitsüsa asenok aliba tetezüji asenok ano nisung maküm. Item ama asenok jakla yimya ya bilemdangdang, shiruru nem tula süoshi semtsür senzüdaktsür amai bilemer. Tang tashi asenoki asen kidang aser kima jana okdener yimkong jajaba lenmang aser kilentzü nung enoka toktsür. Ibaji nisung nüchi mapa asütsü na ? Ano, asenok aikati sali ya chiyongtsü tajung ka ama kanga sapua achir, ajia kecha masü saka majungbaji asenoki sali metsüji tangar kidang aser office nung kinük bushia oagi metsüa toktsür. Ano, karibo narodong kanga junga meyia alidak metsüloka toktsür. Tangarbo taliba kidang dang masü saka yimkong mapa inyakdak metsümeshiba kilong dena teronem menema mozü tzü agi shidoker sentsü ajak lashia ayur saka asenokbo sali metsü agi kinük kisang ajak menenadoktsür. Asenoki asenoksasa asenok taküm yimya ya bilemdangra, asenok ya mazüoktetba aser tashi mangaba shiruru telok tuluka külemi alirang mesük. Asenok aolen ajak janaona, sali metsü aser metsümeshiba agi alima menenadoktsür. Nisungtemi jara nung asenok nem reprangdaktsütsü asoshi ” Yangi metsü temetsü”, ” Yangi jana teindok” ta zülua toktsür saka asenoki yangji dang sali metsüa metsür aser janonatema endoker. Nisungtemi asenok dang asenoki agiba taa yari mapa inyaktsü arung ta japet ajar saka asenoki maor. Nisungtemi asenok ya parnok ama nisunga ta bilemer saka asenok ano nisung maküm. Asenokia asen kija agitsübo tuluka inyakteter, anungji asenokia asenok ya nisung den kasasa ta bilemer saka asenoki asen kija agitsü aser ajangzüktsü atema temulung agüja inyakba ama, yimkong ajungtsü asoshi inyaktsü rajema maru tashi asenok nisung masütsü.