District Hospital Dimapur nung PwD pur nem teyari agütsü

Dimapur, Aenjeti/Jan. 29 (TYO): Minister for Health & Family Welfare, S. Pangnyu Phom-i Bodhbarnü District Hospital Dimapur nung Persons with Disabilities (PwD) atema teyari aser oset balala lemtsüba camp ka lapoktsü.
District Disability Rehabilitation Centre, District Hospital Dimapur aser Prodigal’s Home den lungjemer iba sentong ya National Institute for Locomotor Disabilities (NILD) Kolkata ajanga ayongzüka liasü.
Iba camp nungi matamabensai aliba nisung 244 tajangzük angu, kong tsüngtsüker, tenarong agi junga mangashir, tenük agi junga mangur, tekolok meshidak, cerebral palsy aser tanga matamabensartem nem teyari balala agütsü.
Iba camp lapoktsüba mapang Minister for Health & Family Welfare, Pangnyu Phom-i ashiba agi, matamabensai alir atema health sector nung teyari agütsüba kisüng masü saka government sector nunga employment tsütsüa lenmang lir.
Lokti nung tajemzükba tia nung alirtem yaritsü aser ajungkettsü atema sorkari sentong balala yanglur, ta pai ashi. Item teyari agitsü asoshi nüburtemi department dang asüngdangtsüla, aser state sorkari state nung matamabensar yaritsü renema lir, ta paisa ashi.
Minister Pangyu-isa matamabensai alir atema sentong balala nung shilem agirtem dang matamabensai alirtem shingaia mezüngmeshi masütsüsa teyari lenmang shidak bushiteta agütsütsü ajungshia liasü. Paisa iba sentong nung Persons with Disability pur nem teyari agütsüba oset balala lema agütsü.
Kasa sentong nung Nagaland state Commissioner for Persons with Disabilities, Diwthono Nakhro-i ashiba agi, matamabensaba yagi department ajak nung kongshir aser Persons with Disability pur state nung kasa senso tata temeden angutsü asoshi ajaki lungjemer inyaktsüla aser parnok temeden meraksatsütsüla.
Rights of Persons with Disabilities Act mapa küma amshitsü ya kanga tongtibang lir, aser Act kübok mela aliba ama asenoki shidak amshitetra maparen aika pa-sasa agi inyakadoktsü, ta lai ashi.
Persons with Disability pur atema Naga nunger ajungai mera agia külemi inyaktsü mapang lir, koba nüburtem rongnung tajemzükba tia nung alirtem lir.
Kasa sentong nung laisa District Disability Rehabilitation Centre nung matamabensai alirtem asoshi metzü meshiba tesem ka lapoktsü. Iba sentong nung Deputy Commissioner, Dimapur, Anoop Khinchi aser District Welfare Officer, Hotoi Sema nungeria jembia liasü.