Congress lenirtemi Parliament kima longkak ait

New Delhi, Aenjeti/January 31 (Agencies): Linük kümzüktsü aser Citizenship Act, NRC aser NPR anema longkak aitertem pusemba temaitsü Hokolbarnü Congress Tir, Sonia Gandhi leniba nung Congress lenirtemi Parliament kima Mahatma Gandhi kürakyanglu anasa longkak aitogo. Parliament kima Congress Tir, Sonia Gandhi leniba nung longkak aitertem rongnung party lenir, Rahul Gandhi, Rajya Sabha nung opposition lenir, Ghulam Nabi Azad, senior lenirtem- Motilal Vohra, Ahmed Patel, Adhir Ranjan Choudhury, AK Antony aser Rajya Sabha o Lok Sabha naprongla nungi party MP tem ajak dena liasü.
Parnoki ‘Linük temzüng kümzükang’ ta ozülu amer sorkar anema yimyim ayima liasü.
Iba dak alia Parliament telung nunga linük Tir, Ram Nath Kovind-i jembiba mapang nung Parliament House anaprongla nungi MP temi Parliament Central Hall nung longkak aitba temaitsü tekabu nung lisü tanak mesür amen.
Parnok nem menden lemzüktsüba sülen Congress MP temi block ka nung külemi amen. Narenrdra Modi-i aniba sorkari Citizenship Amendment Act agizükba ajanga India linük temzüng makogo, ta shia parnoki tekabu nung lisü tanak mesür amen.
Linük Tir, Kovind-i, Parliament House anaprongla nung CAA agizükba ajanga linük tebuti, Mahatma Gandhi taginüba ataloktsüogo; iba ya putiotsü asütsüsa lir, ta ashibaji sorkar atema maksütsü lir, ta shia Congress dang masü saka tanga opposition party temia lisü tanak mesür amen.
Parliament nung longkak aita lisü tanak mesür amener party temji Congress, Nationalist Congress Party (NCP), Samajwadi Party (SP), Dravida Munnetra Kazhagam (DMK), Rashtriya Janata Dal (RJD), Communist Party of India (Marxist), Communist Party of India, Shiv Sena, Jharkhand Mukti Morcha Janata Dal (Secular), Revolutionary Socialist Party (RSP), Kerala Congress (M), Indian Union Muslim League (IUML) aser National Conference (NC) liasü.