Air India B747 tayimtsü ajanga China nungi India nunger anir arur

New Delhi, January 31 (Agencies): China nung Novel Coronavirus tashidak wara poktetba nung ajemdaker China nungi India nunger kaketshirtem anir arutsü atema Air India indang tayimtsü- 423-seater jumbo B747 Wuhan-i yoka liasü, ta ketdangsertem osang ka ajanga metetdaktsü.
Iba tayimtsü nungji Health Ministry nungi doctor pongu aser paramedical staff ka densema lir.
Air India Chairman aser Managing Director, Ashwani Lohani-i, “Tayimtsü nungji service malitsü. Yangji aliba chiyungtsütemji ‘seat pockets’ nung ayutsü. Service malibayong cabin crew aser passengers tsüngda tongtepratep malitsü,” ta metetdaktsü.
“Tayimtsü nung crew aser passengers atema mask anepaluogo. Onok crew atemabo ‘protective gear’ tabensa renemogo,” ta paisa metetdaktsü.
China nung iba tashidak poktetba tiyongtsü tesem- Hubei province nung India nunger 600 shi alir aser parnok meyipa anir arutsü atema India ketdangsertemi parnok den-a jembiogo.
China nung novel coronavirus tashidak wara ajanga tang tashi nung nisung 213 süogo aser nisung 9,692 dak iba tashidak putetogo. Hubei province kija nunga nisung 5,806 dak iba tashidak putetogo aser iba nungjagi nisung 204 süogo.