Ozü sorkari chiyungba yimya menokdangtsü: CM Mamata

Kolkata, September 21 (Agencies): Mumbai nung nashi shi ayokba nokdangba ajanga tawa mangatettep adoka aliba nung densema tanü West Bengal chief minister, Mamata Banerjee-i, lar sorkari kodanga nüburtemi chiyungba yimya menokdangtsü, ta ashi.
“Nisung kati pai mesüra lai chinüba chiyungtsü achitsü temeten lir. Onoki kodanga nüburtemi chiyungba yimya menokdangtsü,” ta tanü Kolkata nung minority development department sentong ka nung jembidang chief minister-i ashi.
Ajisüaka lai Maharashtra nung BJP-i aniba sorkar tenüngbo metetshi.
“Ozü state nung telemsa adoktsüji ni memelatsü, nisung ajak dak temeten kasa lir, ibaji kü tangatetba,” ta Netaji Indoor Stadium nung minority kaketshir merirjang aika adenshia alidak lai ashi.
Mumbai nung Jain, Paryushan benjungmung mapang nashi shi ayokba nokdanga liasü aser ibaji ajanga mangatettep adok.
Tanü minority development department sentong nung Mamata-i taküm state civil service tatidang balala nung takok angur minority kaketshirtem nem awards lemja liasü.
Laisa, lar sorkari minority nüburtem libaliro ajak nung yaritsü melunga lir, ta ashi.
“Onoki minority terenlok atema sen crore 2,400 crore intokogo, aser state nung taoba sorkar (Left Front)-ibo parnok atema tera dang inyaktsü,” ta lai ashi.
“Alia University ya sen crore 236 intoka yanglu aser yangji aliba Park Circus campus nung sen crore 62 intok,” ta chief minister-i ashi.
Chief Minister Banerjee-isa, minority aser minority kaketshir kecha tebendang makai class 9 nungi 12 kaketshir tetsürtem nem agütsütsü atema cycle lakh 40 alizüktsü jembiogo, ta ashi.
Minority development department ketdangsertem tenüng sanga lai, ” Minority nüburtem aser kaketshirtem terenlok tulu alibaji parnok (ketdangsertem) ajungba aser parnoki anibelem arema inyakba ajanga lir,” ta ashi.