R.N Ravi-i ex-servicemen yaritsü ayongzüker

Dimapur, January 31 (TYO): “Lanuwa asüdang parnoki linük tenzükba wadang nung bendanga agüja shilem agiogo, anungji ex-servicemen asoshi asenoki bilemtsütsüla,” ta Nagaland Governor RN Ravi-i ashi.
January 31, 2020 nü Raj Bhavan, Kohima nung Rajya Sainik Board indang 23 buba Annual Meeting amendang Ravi-i iba tayongzükba agütsü.
“Nagaland kübok district balala nung Deputy Commissioner temi ex-servicemen yaritsü atema lenmangtem bushitsüla. Ex-servicemen ajak nem sorkar mapa agütsütsüji tamakoktsü, anungji asenoki parnok yaritsü atema tanga lenmangtem bushiteptsü nüngdaker” ta Governor Ravi-i ashi.
“Naga lanurtem dang Armed forces indang aser talisa Indian Navy aser Indian Air Force indang osang metetdaktsütsüla. Iba ya Nagaland ama state atema kanga nüngdak lir. Rajya Sainik Board-i anir Nagaland nung recruitment drives indang osang prokshitsüla. Linüki Nagaland nung alir nübo shitak mamshii lir,” ta paisa shisem.
Nagaland state sorkari taruba küm pungu atema Rajya Sainik Board atema corpus fund nung senotsü teyari agütsütsü lemtetba atema Chief Minister Neiphiu Rio nem tenüngsang agütsür. Iba mapa ajanga Nagaland state nung ex-servicemen-i teyari angutsü, ta Governor Ravi-isa metetdaktsü.
23 buba Annual Meeting nung Corpus Fund, Empanelment of Hospitals, Kohima nung State level Multifaceted Sainik Rest House yanglutsüba aser Officers and Personnel Below Officer Rank atema Selection Board shimtsüba onüktem benoka lemsatep.
Iba sentong nungsa Nagaland Chief Minister Neiphiu Rio, GoC, 3 Corps aser AOC-in-C, Eastern Air Command nungertemia o jembi.