Arunachal nung coronavirus atema border market shibang

Itanagar, February 4 (Agencies): Coronavirus agi shirang adokba sülen Arunachal Pradesh kübok Changlang district ketdangsertemi Pangsau Pass Market shibangogo.
Iba shishilembadak ya Indo-Myanmar arrtsü anasa lir aser March 21, 2020 tashi melapoktsü tetuyuba agütsüogo.
Nampong nung senden ka amendang ketdangsertemi Pangsau Pass nung border haat shibangtsü telemtetba agi.
Coronavirus noktangtsü atema parnoki iba telemtetba agi aser ketdangsertemisa Nampong aser Tikhak Rima Putok nung gaon burah aser panchayat interim committee züngsemtem dang coronavirus osang prokshitsü tetuyuba agütsü.
Ketdangsertemi nisungtem Myanmar leni moudaktsütsü atema tetuyuba agütsü.
Pangsau Pass market ya ita shia 10, 20 aser 30 anogotem nung dang lapoker.
Iba mapang India aser Myanmar nungi shishilembartemi border market nung ayoker.
Pangsau Pass ya Patkai Hills nung lir.