J&K aluyimertem nem Kisan Credit Cards agütsütsü

Jammu, Tsüklai/February 4 (Agencies): Jammu and Kashmir union territory nung aliba aluyimertem nem taküm March 31 nü tashi nungbo Kisan Credit Cards (KCC) agütsütsü, ta chief secretary B V R Subrahmanyam-i metetdaktsü.
KCC Scheme inyakyim, Pradhan Mantri Kisan Samman Nidhi (PM-Kisan), SDRF kübok aluyimertem nem teyari agütsütsü asoshi, MGNREGA mapa benoka inyakba aser tanga ken o balala lepa reprangshiba senden ka Subrahmanyam leniba nung video conference ajanga agia liasü.
Tajangzük agitsüpurtem züngoksemba inyakyim kanga meyilongi aoba dak sendakba nung pa mepelaba lemsatepa liasü.
“March 31 nü tashi nungbo maparen temtembanga inyaktsü asoshi DCs (District Collectors) leniba nung pei district tem nung anogo lateta yur inyaktsüla,” ta pai ashi.
Anogo atakzüker aliba mapang tashi nung maparen takok nung tembanga inyaktsü asoshi Divisional commissioner Kashmir and Jammu-i inyakyim terenlok asadanga alitsü.
Paisa, CD tem dang an, ango aser ibala mesükba luyim nung ajemoka inyakertema KCC Scheme nung züngoksemtsü, ta ashi.
“Nisung taila benokba nungi jenbotsü atema iba scheme ya Aadhaar den sendakteptsü akok,” ta pai shisem.
Divisional commissioner Kashmir aser deputy commissioner tem den tongtibang bank tem nung ketdangsertem aser tanga ketdangsertem iba senden nung dena liasü.