Mezüngbuba ‘power consumers’ court’ agi

Kohima, February 4 (TYO): Nagaland state power department-i sorkar department ka ama dang mesüi sen aazükba department ka ama inyaktsüla, ta Nagaland Electricity Regulatory Commission (NERC) Chairman Imtikumzuk Ao-i tayongzükba agütsüogo.
February 4, 2020 nü Nagaland nung mezüngbuba power consumers’ court agidang Imtikumzuk-i ashiba agi “2003 küm Parliament indang Act ka ajanga India nung power sector nung temelenshi bener aru.”
“Iba dak sendakba nung, Nagaland nungbo tanga state tem ama temelenshi kecha mali. Department ketdangsertemi power auya atsükba azüoktsüla, kechiyong iba ajanga sen aazükba nung kongshir. Electricity Act kübok power auyazüka atsükba ya ozüngi memelaba inyakyim lir, aser tepuokdak ayutsüsa temerenshi lir” ta paisa ashi.
Power atsükba atema teti sen menoka arurtem aser tenüng atema sen menokertem tsüngda meputep aliba aser aibelena bill agütsüba indang onüktem tanü okadak benoka liasü. Iba atema taruba commission senden nung obendang agütsütsü ta NERC Chairman-i metetdaktsü.
Paisa ashiba agi, “power department tajungba akümtsü atema consumer court ya kanga tongtipang lir.”
Nagaland nung power atsükertemi metre reading tai anguba, power tariff ajungketba aser bill shitak meputepi agütsüba onüktem benokang, ta Imtikumzuk-isa metetdaktsü.
Iba sentong ya Engineer-in-Chief of Power Department indang conference hall nung agi.