Asen tetsü oshi

Joko, taküm küm asoshia alima ajunga nung tetsü oshi anogomong amongtsü asoshi February 21 anogo nenjunga arudagi. Tang ama, iba anogomong anasai arudang asen tetsü oshia koba jenjang nung aliar asenok ajaki khen reprangdangtsü nüngdak adoker. Atangji, iba anogomong ya sentong tulu ayongzüka mamongtsüa akok saka pei kidang mesüra pei mapa inyakdak pei tetsü nem aküm agüja pei oshi nung o tajung ka jembitsü mesüra ken tajung ka atentsü mesüra kar dangi shidi tajung ka pei tetsü oshi nung zülutsü bilema ataa lir inyakra, iba jagi asen tetsü oshi asentenshia renlokba nung shilem tuluka agir asütsü. Tanü putu nung alirtem asoshi shisabolutsükaji alima nung kin tilatem aika pei tetsü oshi samatsüba tia nung aliba tensa ya asütsü. Tang tashi nunga alima nung oshi noklangka shi samaogo aser ano noklang aika samatsüba tia nung lir. Ashiko, asen Naga lima nunga tetsü oshi karbo tejembir nisung meyirijang majung kümer asütsü. Idakji aoksar asenoki asentenshia pei tetsü oshi wazüka ayutsü bilema meinyakra, pei tetsü oshi jembir noklang ishika jagi küm ishika tsüngda noklang majung kümadoktsü aser oda oda pei tetsü oshi jembir nisung asem danga, ana danga ta jembia jembia ka kisüng anüngtsü aser samatsü. Talisa asen lima nung Nagamese sapua jembiba agi aser ano English jembirtemjiang jenjang tajungba nung alir ama bilemba agi, pei tetsü oshi ya tetsütemi dena mejembii kümogo. Pei kini jembiba oshi dang pei tetsü oshi ta ajaba ya, kinü tanur ka bang nung pei tetsü meli agi mezüng alima nung jembiba oshi ka mejakoktsüba agi tetsü oshi ta ajar.Tanü iba tetezü ya danga tetsütemi angatetlasang, tanurtemi pei tetsü oshi tajungba renloka aotsüsa sapua jembila. Oshi ya angatetteptsü asoshi dang masü saka tetsü o tetsü na aser tetsü o tanur na tsüngda alima mesama tashi amangyonga aotsüba senmang lir ta talisa tsüraburtemi angatettsü junger. Asenoki koba nü pei tetsü oshi jembi anendir mesüra koba nü asenoki asen chirnurtem dang asen tetsü oshi parnok bang nung mejakoktsüba anendir, iba anogo aser iba mapangji asenoki asenoksasa asen tsürabur otsüla aser ojala nunger leper nung mejanga alirtem den teti asoshi tesendaktep raksar asütsü. Asenoki asen tetsü oshi mejembii anenba anogoji asenok nem asen tsüraburtemi agütsüba senti senmang tulubaka endoker asütsü. Alima nung asen kin aser asen taküm ya tangar dang nungi balaka ta sayutsü aser jangjatsübaji pei tetsü oshi ya dang lir. Asenok Americai aonunga America nungertemi asenok dang English agi long dang mesüra tzü dang kechi ajar ta masüngdangtsü. Asenok dang English ken ka tenang ta masüngdangtsü, saka Ao agi iba dang ya koma ajar ta, aser Ao agi ken ka tenang ta dang asüngdangtsü. Iba jagi asen apokba tezü aser asen kin ayak tali jangjatsü. Tanübo, taoba putu nung amato masü, tanurtem kaketrejui maodangyongi English aser Hindi oshitembo shiadoker, anungji kidang aser kaketreju nung pei tetsü oshi sayutsübajiang tsüraburtem asoshi kanga tongtibang kümogo. Atangji, oshi yabo kaketreju nung sayuba kija agi masü saka jembia aliba agi aser azüngba ajanga angazüker. Kaketreju kecha nunga Nagamese mesayur saka tanurtemi Nagamese tama angazüker. Iba nungji asenok ajak atema tangazüktsü tongtibang ka lir. Tanurtemi pei tetsü oshi mejembitetba ya parnoki mejembinüba agi masü saka asenoki parnok den mejembiba ajanga lir. Tanü asüng lanurtem asoshi balaka akhi tetsütebou mapa nungi benshia aruba sobaliba otsü aser achiajemba indang shisabushiloka (research) aotsü nüngdakba mapatem aika lir. Itemji tsüraburtem den Nagamese agi mesüra English agi asüngdanga sensakmasemtettsü. Iba kisüng atemajia tanü putu tanurtem asoshi pei tetsü oshi kanga junga metettsü nüngdaker. Pei tetsü oshi ashitsübaji kidang jembiba den külemi tanurtem nem pei pei tetsü oshi agi Laishiba tekong ka züngdaktsür külemi Ao ken ka tener sarasadem mapang agira, iba kija jagi pei tetsü oshi angazükba sentong ajanga asen kibongi temoatsü arutsü. Pei tetsü angazüktsü atema teti pei kidang jembiba den külemi All India Radio Mokokchung nungi yokba sentongtem angatsüla aser Ao oshi agi adokba osangkakettem azüngtsüla. Oshi agi terenlok mapa inyakba indang jembir, yimjung yanglutsür aser putepa alitsüsa shisa tajung bener arua ashir. Ibaji taküm 2020 küm atema UN-i Alima Tetsü Oshi Anogomong atema shimtetba omen lir.