Tanübo alimai asenok dang nungi aika imlar: PM Modi

New Delhi, February 06 (Agencies): Linük Tir, Ram Nath Kovind-i jembiba onük dak sendakba nung ‘motion of thanks’ o lemtepba mapang Brihostibarnü Lok Sabha nung Ato kilonser, Narendra Modi-i par sorkari inyaktetba mapatem aser par sorkari asalentong yanglua kera inyakba ajanga tajangzük angubatem metetdaktsü.
Lok Sabha nung Modi-i jembiba onük aika rongnung kar yamai liasü—
“Koma ser nenoki item mapa ajak ya aritepa inyaktet, ta onok dang asüngdaer? Item mapa ajak kera inyaktsüsa kechiba nüngdaka liasü?” ta pai ashi.
“India nüburtemi sorkar kija nung temelenshi madokdaktsü saka parnoki tesendaktep-a melenshiner,” ta pai ashi.
“Onoki akhi tejen yimya aser tejen inyakyim nung inyak asübo Arrla 370 ya putiotsü mekümi lila; Muslim tsürtem tang tashi Triple Talaq agi timtema lila; Ram Janmabhoomi ken o ya tang tashi mebenteti lila; Kartarpur Sahib corridor ya atangji nung mataloki lila; India-Bangladesh ali tezüngzüktep magii lila,” ta Modi-i ashi.
“Tanübo alimai asenok (India) dang nungi aika imlar. Asenoki tasütait tanüla sayutsü nüngdak aser asenoki tang ajangashiba tayongzükbatem koktettsü atema inyaktsü nüngdak,” ta Ato kilonser, Modi-i ashi.
“Asenoki Northeast indang jembidi. Küm jenti iba tesem sendoka yutsüba kuliji tetsüngda talangka aitba liasü. Tangbo ibaji melenshiogo. Northeast ya renlokba gol ka kümdar. Lenla aika nung mapa tulu inyakogo. Ministers aser ketdangsertemi mapang shia iba region semdanger,” ta pai metetdaktsü.
“Yimtenren nung ajemdaker state karibo aluyimertem nem PM-Kisan Scheme ajanga tajangzük magütsür. Ni parnok dang aluyimertem jenjang ajungkettsütsü atema yimtenren maitdaktsüli ta ayongzüker. India nung aluyimertem azükarutsü atema asenok ajak longjemer inyaktsüla,” ta pai ashi.
January 31, 2020 nü linük Tir, Ram Nath Kovind-i Parliament House anaprong (Lok Sabha & Rajya Sabha) nungi züngsemtem den jembiba sülen February 1, 2020 nü Finance Minister-i Union budget 2020-21 benoka liasü.