Tourism Dept. nung ochimashi bushisüngdangba atema pelar: NPRAAF

Dimapur, Tsüklai/February 06 (TYO): Lokayukta Nagaland-i Tourism Department nung ochimashi aser ozüng alema mapa nung shimokba onük agizükba atema Nagaland Public Rights Awareness and Action Forum (NPRAAF)-i Lokayukta dang kanga pelar; iba ken o ya tatembang ka dangi marura iba ya amajok nung khen atema osang ka dang asütsü, ta Brihostibarnü Information & Publicity wing NPRAAF-i sangdong ka ajanga metetdaktsü.
“Tourism department ya kanga tongtibang department ka lir, aser iba ya tarutsü nung state rongsenkettsüng atema tongtiret ka akümtsüa akok, ajisüaka iba department nung ketdangsertem shimba tsütsü service rules alema inyaka arudar. Department-i yimtenren (political) tsütsü nungi rongshiba ajanga department nung 3rd aser 4th grade staff shimmer, aser ibaji ajanga terenlok makar. Department-i NPSC tatidang ajangadang Tourism studies nung degree ngua alirtem dang Tourist officers shimtsüla,” ta NPRAAF sangdong nung shia lir.
NPRAAF-i item onük ya Lokayukta den lemsatepner: “Sl. No 2 nung PWD housing kübok inyaker section officer (S/A) ka küm 1 atema 28/12/ 2007 nü Tourist Officer (TO) shim, aser ibaji-a December nungi Feburary 2007-08 tsüngda election code of conduct benoka aliba mapang nung shim. Ano maneni 02/01/ 2008 nü paji Assistant Director Tourism shim, ibajia election code of conduct benoka aliba mapang nung liasü. Peoples representation Act 1951 kübok iba mapang nung appoint asübaji ozüng alema lir,” ta sangdong nung shia lir.
Iba post ji NPSC ajanga shimtsü, ta appointment letter nung shia lir, ajisüaka pa appoint asübaji 05/08/2010 nü Cabinet-i agizük, ta sangdong nung shia lir.
“Maneni Sl.No 3 indang service ji 16/12/2018 nü Nagaland Angh sangdong ajanga extend asü, ajisüaka pa tenüngji ‘incumbency list of tourist officers to the upgraded post of Assistant Director/Sr. Tourist Officer’ nung release süa lir aser 02/06/2006 nü shim. Pa graduate teacher ka süaka 28/12/2007 nü sorkar sangdong ka ajanga küm ka atema deputation nung yokba lir aser iba post atemaji NPSC exams ajanga dang shimtsüla,” ta sangdong nung shia lir.
“Ano tanga order ka, Sl no.2 nung peon den kasa Sectional Assistant (Mohorrir) ka aser Sl no 3 nung Graduate teacher ka 5/8/2010 nü Cabinet-i agizüka department of tourism nung appoint asü, ajisüaka parnokji 02/01/2008 aser 02/06/06 anogotem nung Assistant Director rank nung shimba liasü,” ta sangdong nung shia lir.
Maneni Sl No 5 ji P&AR Govt of Nagaland-i sanction mesüi 13/09/2010 nü appoint süa regularise sütsü, aser ibaji service rule alema lir, ta parnokisa metetdaktsü.
“Iba dak sendakba nung NPRAAF-i, sorkar departments-i service rules nung aliba ama inyaktsüla asü cabinet rules nung inyaktsüla?, ta süngmanger. Tourism Department nung taoba mapang IAS officer in charge anema bushisüngdangba den külemi Lokayukta-i ochi temeden reju nung tamang katettsü aser maparen teladak asütsü atema ozüng alema inyakertem anema ken o benoktsü asoshi inyaktsüla,” ta sangdong nung shia lir.
“Ochi temeden angutsü atema Nagaland sorkaria akokba tashi Lokayukta den amalitepa yariteptsüla, kechiyong ozüng alema appoint süa regularise südaktsütsü atema Cabinet dang yazü jembi asütsüa akok, ta item tatalokbatem ajanga kuli sayur,” ta NPRAAF-isa metetdaktsü.