Electoral Roll sangdongtsü atema Kohima nung senden amen

Dimapur, Tsüklai/Feb. 07 (TYO): Special Summary Revision den raloksema photo electoral roll tatembangbuba sangdongtsü aliba dak sendakba nung senden ka February 07, 2020 nü ADC Office Chamber, Kohima nung agia liasü.
ADC Kohima Lithrongla Tongpi Rutsa-i senden nung jembiba mapang, vote agütsütsü temsüa aliba nüburtem asoshi final Electoral Roll ya kanga tongtibang lir, kechiaser mapang tatsüka tsüngda Kohima District nung ano election ka ajurutsü lir, ta ashi aser political party tem, AERO’s aser BLO’s tem dang vote agütsütsü temsüa aliba nüburtem indang data lemsatepa noksa, tenüng, arishi küm, address aser gender amala meputepi aliba aibelen reprangtsü ajungshia liasü. Melenshitsü kar lira, maneni melenshitsü.
Vote agütsütsü asoshi temsüa arishi küm 18 ajunger tenüng tasen aika züluokogo, anungji election timi agitsü atema sür aliba osang magütsüi alirtem bushiteta osang agütsütsü laisa ajungshi.
Maneni Final Electoral Roll renemba maparen nung yaritepba asoshi laisa political party, AERO’s aser BLO’s tem dang pelaba metetdaktsü.