MLA Moatoshi-i apu tasen ka semzüktsü

Dimapur, Tsüklai/February 18 (TYO): Boro Lingri nungi LRC Colony aser Notun Basti sendaktepba apu tasen ka Febuary 18 nü 2 Dimapur II AC MLA Moatoshi Longkumer-i semzüktsüogo.
Apu tejeba kanga mejungi raksar liasü aser yanglushitsü asoshi nüngdaka liasü. Iba apu ya ayong adena orr Assam nung aliba yimtsüng pogushi atema tongtibang lenmang ka liasü. Anatsülen apu adener alirtem ya timba ayaanga chiyonger aser sen tera dang aaba kibongtem lira ser iba apu meyanglura parnok asoshi tetsükdaktsü tulu adoktsü. Parnok anogo shia maparen balala asoshi iba apu adena senzür aser kaketshirtema school balalai aotsü atema iba amshir. Maneni shishilembadak tongtibangtem aser railway station-i aotsü atema iba lenmang ya anatiba lir.
Anungji 2019 küm Council züngsemtemi MLA dang gari ana süiteptettsüsa apu ka yanglutsütsü asoshi asüngdanga liasü.
Apu lapokba sentong ya Bagan Bridge Construction committee Bor Lingri-i achaayanga agi, koba Kazheto Sukhai lenisüba kübok agi aser UBC pastor Rev. L. Bendang-i sarasadema liasü.
Sentong nungsa Adivasi Tea Estate Gaon, GB Holuto Awomi-i, iba mapa tajung asoshi MLA nem tenüngsang agütsü. Paisa, parnoki Nagaland aser Assam nung ketdangser aika dang iba apu yanglushitsütsü asoshi asüngdangogo, saka takok mungui aru, ta ashi.
Moatoshi Longkumer-i o tatsüka jembiba mapang Tsüngrem nem aser apu takok ngua yangluba nung densema aliba nisung ajak nem tenüngsang agütsü. Paisa, apu ya nüburtem anisüngzük aser tajangzük atema yanglu aser ozüng alema inyakba maparen balala atema mamshitsüla, ta ashi. Maneni pai colony aser yimtsüng council balala dang kümküma alitsü ayongzük.