Centre-i Pulwama nung asür sepaitem tenüng memetetdaktsür

Panipat, February 18 (Agencies): Yaküm February 14 nü Pulwama kiralongraba lendong indang bushitetba osang Centre sorkari yimjak nung metetdaktsütsü memulunger.
Iba lendong nung Central Reserve Police Force (CRPF) jawan 40 khaset.
Iba ya Right To Information (RTI) tasüngdangba ka langzüdang Ministry of Home Affairs (MHA)-i metetdaktsü.
Panipat nungi RTI activist, PP Kapoor-i Jammu & Kashmir kübok Pulwama district nung khasetba sepaitem indang osang metetnüa asüngdanga liasü.
Ajisüaka, Centre-i sepaitem indang tenüng memetetdaktsüba den külemi sepaitemji linük atema taküm bendanga agütsürtem asü masü’ar iba osangji memetetdaktsür. Centre-isa tasür kibongtem nem teyari agütsüba indang osang memetetdaktsür.
PP Kapoor-i January 9 aser January 10 anogotem RTI application balala ana agütsü. Iba ya Union Home Ministry kübok Director General of CRPF nem agütsü.
Kapoor-i onük pungu metetnüa asüngdang aser pai asüngdangba onüktem rongnung- tasür jawan tem indang tenüng aser designations, ken o bushitetba osang aser bushisüngdang asüdang aibelena inyak ta tai tongloktsüba ketdangsertem indang tenüngtem.
“CRPF Directorate (administration) indang DIG aser Public Information Officer, Rakesh Sethi-i telangzüba agütsütsü memulung. RTI Act-2005 kübok lateta aliba onüktem nung ajemdaker CRPF-i iba osang magütsütettsü ta pai langzü” ta Kapoor-i ashi.
Pai ashiba agi, “sorkari tamakok anguba osang mimbanga yunür. Külen, India sepai 40-i linük kümzüka ayutsü atema parnok taküm bendanga agütsü, saka külen sorkari parnok indang tenüngtem memetetdaktsür.”
“Pulwama amakba ya ochimashi ken o ka aser CRPF personnel sepaitem dang meimchir temeten magütsüba lir. Parnoki iba osang mimbanga ayuba tetezü ya, iba lendong nung sepai talila asüba atema alitsü akok” ta Kapoor-isa shisem.