NCSF Chairman-i ‘Swachhata Abhiyan Programme’ tenzüktsü

Dimapur, February 18 (TYO): National Commission for Safai Karamcharis Chairman, Manhar Valji Bhai Zala-i February 18, 2020 nü Kohima nung ‘Swachhata Abhiyan Programme’ tenzüktsü.
Iba sentong ya 2014 küm Prime Minister Narendra Modi-i tenzüktsü. Iba ya linük ajungalen merükmejutsü, temang anepualutsü aser tema nung metsümeshiba anentsü atema tenzükba lir, ta Zala-i ashi.
Paisa Kohima Municipal Council (KMC) kübok sanitation workers, Green Team Kohima aser tebilemtsü abenba sensotemi Kohima merükmejua ayuba atema tenüngsang agütsü.
NCSF Chairman Zala aser pa den arurtemi Kohima Deputy Commissioner Gregory Thejawelie NCS aser KMC Administrator & CEO KSCDL Kovi Meyase nunger den külemi Kohima jila merükmejuba mapa inyak.
Iba nübodokba mapa nung Kohima Chamber of Commerce aser Green Team Kohima züngsemtem den Safai Karamcharis-i yaritep.
Maneni, Kohima Municipal Council-i angati medical health check up camp ka ayonga agi.