Nübortem ajuruba anogo

Manipur nungertem nungi asenok tangazüktsü aika lir aser item rongnung tongtibang kaji, Chief minister N.Biren Singh-i ita nung anogo ana nübortem ajurutsü asoshi shimteta lir. Item anogo anaji ka 10 nü aser tanabuba anogoji 15 nü ajurur. Iba anogo dang “Meeyamgi Nimit” aser Hill Leaders’ Day ta ajar. Iba anogo nung Manipur chief minister-i anepdang nungi nikongdang tasshi nübortem ajurua parnok timtem aser taginüba nüngdaktem ashitsü mapang agütsür. Iba anogo nung ajurutsü purtemji ‘party’ pur ta masü mesüra metettepa alirtem ta masü saka Chief minister ajurua nüngdak shinürtem ajak arua ajutepdaktsür. Aji oda, nübortem ajuruba anogo nung nisung meyirijang ana jungnüa ajurur aser parnok nüngdakji inyaktsütsü atema idangjisa nübortemi pa dang ashiba nüngdaktemji teinyaktsür pur department dangi yoker. Iba anogo nung Chief minister office nung Health department nung ketdangsertem arua mendaktsür aser nüngdakba purtem nem Health card agütsür aser shirangertemi endoka aliba sen meyipa angutsü asoshi ‘reimbursement’bushitsüba mapa nunga yarir.Iba denji idakjisa nübortem nüngdak atemtsüsa Manipur State Cooperative Bank,SBI, School Education department, Social Welfare aser police department amala tongtibang department-tem nungi ketdangsertem arua mendaktsür. Iba anogo nungbo anepdang yakta nungi nübortem chief minister ajurutsü asoshi tenüng zülutsü atema telok tulu küma adenshir, anungji ajungben timtem mapang nung yariteptsü atema ambulance dena bener arua ayur. Manipur nung chief minister-i nübortem ajurutsü atema ita nung anogo ana shimteter inyakya sentong ya 2017 küm May ita nungi inyaker. Iba sentong ajanga talisa makamait aser sensakertem, taküm nung nüngdak aika liaka, chief minister majuruteptettsüsa aliba purtemi chief minister ajurua parnok timtem aser nüngdak shitetter. Manipur nung nübortem asoshi N.Biren Singh-i bener arutsüba temoatsüji ya ka asütsü. Iba sentong denji asenok medemdangra, asenok asoshibo Chief minister dang masü saka yimten yimsüsürtem ajurua nüngdak ashitsü aika liaka majuruteptetter. Nübortem asoshi anogo ka shimteta parnok timtem aser nüngdak angadanga ajurua amongtsü melen asen lima nungbo yimsüsürtem kima “NO Interview””Nübortem Majurutsü” ta yinpak nung zülur angutsü. Ano, nübortem ajuruba anogotem nunga tajuruner ajakibo majurutetter.Atangji, Manipur nunger o Nagaland nung alir Naga nunger na temulungsentsü aser tangatetba balala. Manipur nungbo ita shia nisung meyirijang aikati Chief minister tsüngdong oagi ajuruaka, pei timtem (complaint) aser nüngdak ashiba dak alaka senbo memeshitsü. Ajisüaka, Nagaland nungbo, ashiko, nübortem meyirijang kati kenü Chief minister ajuru nung nisung noklang tiibo sen (cash) meshitsü. Asenokibo tang tashi sen yanglutsü mesüra sen aatsü bilemer masü saka angati sen angutsü bilema jajartem teimba lir. Ibayongji, yimsüsür aser tulurtemia majuruner südi. Shin o nung ashiba ama, asenoki ango chinüra, yimsüsür aser lenirtem dang ango masü saka ango aputsü tasa meshitsüla. Atangji, Nagaland nungbo nübortemi yimsüsürtem ajuruba anogoji election mapangang asütsüa akok aser idangjia asenoki shisatsü masü sen dang meshir, ibayongji election temer peii shimtetba yimsüsürtem majuruteptetter. Joko, asenoka yimsüsürtem ajurua nüngdak lemsateptettsüsa election mapanga aser election magidanga sen masü shisatsü meshitsüla aser sen agi masü tangatetba agi yariteptsüla.