Clark Memorial Hr. Sec School tenzüker küm 125 ajunger

CMHSS quasquicentennial mapatong tenzüka Feb 24 nü tesayurtem atema shisatokden sentong ka akadang, shisalen sayurtem den ABAM tenzükertem, CMHSS Board züngsemtem aser yangji tesayurtem külemi tangokba noksa nung angur. Impur, February 24, 2020.

Mokokchung, Tsüklai/Feb 24 (TYO): Clark Memorial Higher Secondary School (CMHSS), Impur tenzüker taküm 2020 küm 125 ajunger. Quasquicentennial nüngtem nung taküm küm piyong mapatong balala agia aotsü parnok sentong renema lir.
Iba mapatong tetenzüker ka ama, Feb 24 nü CMHSS nung tesayurtem atema shisatokden (orientation) sentong ka Society for Health Care, Education & Environment teloki senotsü teyari agüja parnok senden kilem nung kaogo.
Iba sentong nung Ao Baptist Arogo Mungdang (ABAM), Executive Secretary, Rev. Dr. Mar Atsongchangeri jembidang, CMHSS ya otsüsütsü aketba school ka lir, yangi inyaktsü maongka anguba asoshi pelatsüla aser tesayur shiai yangi kopika tenzükdir, teti menungraa bilemtettsü asoshi ajaki tsüngnep tajung yutsütsü merangang, ta ajungshia liasü.
“Tesayur mapa ya khuret tila masü, tesayur ta ajatsü maongka angubaji jangratemtsü rongnung ka lir, anungji, iba nükjidong angateta tesayur tajung kaka akümtsü merangdaktsünür”, ta pai ashi.
“Agütsüba nung na kodanga mesensaker” ta shin o ka nung ashiba ama, “school tanurtemji ne dang nungi tajungba aser tuluba kümdaktsütsü nükla yur nai shia metetba shisatsü ajak parnok dang nentaka aser tajungtiba agi sayutsüdaktsünür”, ta paisa inyakdaktsünüba olen ka ashi.
Shisalen sayur taoba Mokokchung CMO, Dr. Akaba-i “Anema Aliba (health care)” tsütsü, taoba Ao milen Editor, T. Senka Ao-i “tesayur ka teinyaktsü”, Mokokchung EBRC nung ToT C. Wati Wallingi “Life Skills Education & Environment” aser Mokokchung EBRC I.E Resource Person Sungjemmenla aser Moatula nadi “Inclusive Education (I.E)” onüktem nung ajemdaker tesayur kadi meteta alitsü shisa tarok aika bener arua lemsatep. Iba sentong nung CMHSS Principal Chubainla aser ABAM Education & Literature Secretary T. Apok Jamir nadia shilem agia liasü.
CMHSS küm 125 ajungba nüngtem nung ita shia sentong balala kayonga aotsü renema lir aser tatem nung quasquicentennial benjongji Nov 6, 2020 nung agitsü, ta CMHSS Management Board Chairman, L. Alemtemsü Ao-i osangbener den jembidang ashi.
CMHSS ya 1895 küm lapok aser Nagaland nung school lapoker metitemi tanü tashi taküm lia aruba rongnung tejentibaji iba school ya asütsü. Iba school nungi nüngtugu nisung aika adokogo, tat: mezüng Naga nunger Governor – Hokishe Sema ama, mezüng Nagaland chief minister – P. Shilu Ao ama, nüngtugu footballer – Dr. T. Ao ama, mezüng Naga nunger ordained minister – Rev. Supongwati ama, nüngtugu Laishir I. Ben Wati aser Dr. Renty Keitzar, aser ano aika. Mezüng iba school tenzükdang, American Missionary E.W Clark, F.P Haggard, S.A Perrine aser W.F Dowt nungertemi shilem tajung agiba otsü angur. Iba school nung Naga nunger mezüng head master-ji Gwizao Meru Zeliang (1915-1917) inyak. Mapang ka iba school nungi Aor dang masü Naga nunger kin balala arua azüngba otsü lir.
Tang CMHSS nung ya class A nungi 12 tashi lapoka lir. Higher secondary nung Arts stream dang amenoka lir aser yangji elective subject-temji; Political Science, Economic, History, Education aser Ao aser English subject-ji compulsory agir. CMHSS ya ABAM-i anepaluba school lir. Iba school nung Tsüngrem tenzüker chirtembo fee tesadang ka (50%) dang agir aser tesadang kaji ABAM-i yarir. Iba ya residential school ka, yangi Science lap, Computer lap, Library, tanurtem atema play room aser tetsür teburtem aser tanurtem atema hostel balala lir. CMHSS campus nungji saisapong balala asayadak teperi lir. Education den külemi tanela renlokba sentongtema mapang shia agir. Impur ya Mokokchung town nungi kilometer 17 shi pilar lir.