Kohima nung ‘Sekrenyi cum Mini Hornbill’ benjung amonger

Dimapur, February 25 (TYO): February 25, 2020 nü Khuochiezie (Local Ground) Kohima nung Angami nungeri Sekrenyi benjung mongogo.
Iba benjung dang ‘Phousanyi’ ta-a ajar aser Chief Minister Neiphiu Rio-i Chief Host aser Sumi Hoho Tir, Hekhushe Shikhu-i Honoured Guest ka shilem agia liasü.
“Angami aser Sumi nungertemi mapa aika nung külemi inyaktsü mulungtepa inyaker aser ano onük kar nungbo memulungteper. Asenok ajak azükarua alitsü atema telongjem nung aser adianu ama külemi inyaksangshia aotsü” ta Sumi Hoho Tir, Hekhushe Shikhu-i o jembidang ashi.
“Sumi nunger aikati pei yimtsüng toktsür arua Kohima nung sensotem ama nümatanga alir. Sumi nungertemi Kohima nung alitsüba dang masü saka tasümang-a aremtsü telemtetba agir alir. Angami ali kiburtem ali peria agütsüba atema kanga pelar” ta Shikhu-isa ashi.
Paisa, Kohima nung aliba Sumi nunger dang Sumi aser Angami nunger tesentaktep nung tongshi tajung ka ka asütsü atema mepishia metetdaktsü.
Chief Minister, Neiphiu Rio-ia o jembidang “benjung amongtsü atema mapang, rongsen, telongjem aser yimjung nüngdaker. Naga nunger ajak longjemtsüla aser iba benjung ajanga Tsüngremi Angami nunger moatsütsü aser azükarudaktsütsü imlar” ta ashi.
Iba benjung nung Youth Resources & Sports Advisor, Er. Zale Neikha-ia o jembidang “asen state yimtiba ya Angami nunger ali lir, anungji asenoki Kohima nung alirtem meimtsüla aser pelashishia agizüktsüla” ta ayongzük.
Local ground, Kohima nung Sekrenyi cum Mini Hornbill festival ya tanü nungi tenzüker February 27, 2020 tashi amongtsü.