Nagaland nung ‘Teacher’s Diary’ sayaogo

Dimapur, February 25 (TYO): February 25, 2020 nü Chief Secretary, Temjen Toy, IAS-i “Teacher’s Diary” sayatsüogo.
School Education Department-i Secretariat Conference Hall, Kohima nung sentong ka ayonga agidang “Teacher’s Diary” saya.
“Education department ketdangsertemi Teacher’s diary ayutsü shisatetba atema tenüngsang agütsür. Iba ajanga tesayurtem mitba dang masü saka parnoki meranga inyaktsü atema ajungmesotsü imlar,” ta Chief Secretary, Temjen Toy-i ashi.
“Tesayuba ya jenjang tematiba mapa lir ta züngshir aser iba mapa ajanga tarutsü putu yanglur. Nagaland nung tesayur tajungtibatem lir saka teimba ka kanga majung lir. Anungji, asenoki iba khuret angatettsüla aser teinyaktsütem inyaktsüla” ta paisa ashi.
Education Department-i school mesüra tesayurtem mesüra tanga maparen atema inyakdang, kanga shisadanga aser jungjunga inyaktsüla, ta Temjen Toy-isa shisem.
Alima melenshir saka asenok memelenshira, asen kija akümtsü. Temelenshiji asenoki bendanga agüja aser meranga inyakba ajanga dang angutsü. Tesayurtemi pei temetentem aser tajangzük angubatem atema dang bilemra, ozüngtem lateta ayu nunga kecha masütsü. Anungji, department-i tesayurtem dang mapa inyakang mesüra anenang ta ashitsüla, ta paisa metetdaktsü.
Iba sentong nung School Education Principal Secretary, Menukhol John-i okila jembidang “Teacher’s diary ya tesayurtem indang attendance reprangtsü atema dang masü saka teaching skills aser assessment tajungba kümdaktsütsü atema lir” ta ashi.
Tesayurtemi class takdang nung kechi koma sayu ta meyipa reprangshitsü, koma sayutsü ta shisadangtsü aser kaketshirtem tali jangjatsü atema ‘Teacher’s Diary’ ya adoker, ta Menukhol John-isa shisem.
“Nagaland Education Department indang omenji ‘quality education’ agütsütsü atema lir, anungji tesayurtemi pei mapa süoki ia bilema inyaktsüla, kechiyong tesayurtemi ya nisung ka tarutsü yanglutsürtem lir” ta paisa metetdaktsü.
Tarutsü anogo department tajungba akümtsü atema onoki meranga inyakdar, ta John-isa shisem.
Iba sentong nung Principal Director, Shanavas C, IAS-i tesentepertem pelaa agizük aser Mission Director, Samagra Shiksha, Kevileno Angami-i anküp tepela o jembi.