Meghalaya Home Minister-i nakmati shibelenertem amokmerener

Shillong, February 26 (Agencies): Meghalaya sorkari ozüng alema nakmati shibelenertem merenshitsü ta home minister Lahkmen Rymbui-i metetdaktsüogo.
Police-i State nung aliba gari lenmang ajakbo menüktettsü, saka osang angazükra sorkari mapa inyaktsü, ta Rymbui-i ashi.
Meghalaya, Assam aser Bangladesh sendaktepba lenmangtem lir aser lenmang karbo kanga tezülen lir aser nakmati shibelenertemi item lenmang ajanga shibelener, ta paisa ashi.
Tawa tu West Khasi Hills nung nakmati bena aliba truck gari 83 tashi apu.
Supreme Court tetuyuba ka ajanga Meghalaya nung tuteta aliba nakmati dang shibelentsü melar saka nakmati atutsü memelar.
State sorkari akokba tashi ozüng alema nakmati shibelenba azüoktsü meranga arur, ta Rymbui-isa ashi.
Tawa tu Rongrenggre Forest Reserve nung forest department-i nakmati aser lung shibelener nisung pezü puogo, ta paisa shisem.