Kohima nung Sekrenyi Mini-Hornbill benjong amonger

Dimapur, Tsüklai/Feb. 26 (TYO): Khuochiezie (Local Ground) Kohima nung tang temongdak Sekrenyi Mini Hornbill nung stall balala lapokba ajanga state tesem balala nungi nüburtem jenti atsür arur.
Angamimiapfü Mechü Krotho (AMK) temi anir Southern, Western aser Northern Angami Women Organisation tem nungi Angami tsür telok balalai amenoba stall nung chiyongtsü, teka mapa, tetsü-tebou mapang nungi amshia aruba sübusolemtsü, mozü mamshie yangluba aonsotsü aser naro tem jenjang talang agi ayoker.
Kasa benjongmong nung Tourism department ajanga stall ka amenoka rali-walir aser nüburtem den lenmang balala nung yariteper.
Iba benjongmong asemnü buba ya February 27 anüngdang 12:00 ako nungi tenzüktsü aser nikongdang 5:00 ako nungi sobaliba sentong tenzüktsü, kong Nagaland Khadi & Village Industries Board (NKVIB) Chairman, Dr. Neiphrezo Keditsu tetushi tesemdanger asütsü.
“Exploring Angami’s Musical Heritage” omen nung ajemdaker ayongzükba cultural extravaganza sentong nung telok kari Tenyidie ken mejema atenba nung tokteptsü aser maneni iba sentong nung telok balalai ken atentsü.
Iba sentong nung Atso Chasie, Gei-ü Artist/Music Educator ajanga shilem agitsü, shibai tawa ngutetba musical instrument, Gei-ü amshitsü. Gei-ü ya akhi tetsü-tebou mapang nungi kenten-menü nung amshiba marok kongki, gongkih Lahha aser Nrü-bu osettem tajungba küma yanglushiba lir.
Nikongdang sobaliba dak sendakba sentong ya Sekrenyi Organising Committee den lungjemer Angami Youth Organisation (AYO) ajanga ayongzüktsü.