Sayutsü aser azüngtsü

Joko Nagaland nung tesüiba küm aika government school majungba indang jembia jembia government school nung züngner mali küma omadagi. Ibai tesüngmangtsüka lir, kechiyong, jungjunga bilemdangra, Nagaland nung government school majungtsüsa kuli kecha mangur. Ano, talisa Nagaland nungbo government school-tem ya government-i dang masü saka telidak pur yimsüsür tebu tedi tajungtemi Village/ Ward Education Committee ajanga repranger, anungji tanga school-tem dang nungi government school-tem yasa tajungba asütsü tim. Ajisüaka, tesem aika nung tazünger maliba agi government school-tem aika shibangtsüsa kümogo. Item tesemtem nungji kaketshidaki aotsüsa tanurtem maliba agi masü saka tsüraburtemi government school dak temulung kenyongi malemer, ibayongji, temeimtsüka, government school nung angati züngdaktsütsüba temoatsü aser maongka toktsür, sensaker tsüraburtem anogo shia tangar mapa nung ayangba sen agia matong aser meperi ser pei chirnurtem private schook nung apua timtemseta züngdaktsür. Iba atakatemji shirnok dangi aotsü amai asenokia bilemer ? Joko, asenoki asen ajangzüktsü kisüng bilema bilema, Nagaland nung government school kar nung tazünger mali aser ano tazünger alidak tesayur mali ta timtemdagi. Nagaland jungnüseta majungbaji tesem kaji government school junga moutetba tesem ya asütsü. Government school nung sayutsü shimba tesayurtem aika tajung lir, item jagi khen asentenshir temulung ajak agi bendanga agüja sayu tenzük nungbo, government school-tem ya manger sangwa nung jungadoktsü. Governmenti angati tazüngtsü kaket agütsür aser anüngdang chiyongdaktsür aser tesayur tajungtemi sayur ta asüba kaketrejutemji kodaser majungtsü ? Item kaketrejutem nungji shibaibo mezüngnütsü ? Atangji, Nagaland nung government school jungdaktsütsü jembia jembia government-ia akhidang dang nungi tangsa temulung tagütsüba agüja inyakba angur. Aji oda, government-i government school jungdaktsütsü atema inyakba mapatem rongnung tesayurtem aika mapai mao ser ita sen agizüka achiba anendaktsütsü merangba den ano tawa government school shia nung tesayurtem asoshi anogo shia pei sayutsüba lesson sentong züluba den, ano, ita shia kaketshir shiai inyakba mapa indang zülutsü kaket ka amshitsü tenzükba sentongtem ya asütsü. Ano, iba denji government school shia tanurtem nem kaket azüngba yimya sübadaktsütsü asoshi kaket azüngba tesem aser kaketnang takdang balaka lapoktsütsü inyaka aoba sentong ya jembiba ama shitak inyakteta ora, Nagaland nung government school-tem memenui shia arutsü. Idangjibo, sensaker tsüraburtem akseta temeli agi apu lar o tajung jembia takartem dangi sen apui maotsü. Idangjibo, government school nung azünger tanurtemi makamaitba agi teimla mali kaketreju tamajung nung azünger ama nümamedangi mebilemtsü. Idangjibo, government school nung tesayurtema peii sayuba tanurtemi takok tajung bener arutsüba agi pei mapa agi pei nümadangteta jangratema anogoa tao memetet sayutsü. Iba ama anogo aser mapang tajung kaji tesem ka nung tessayur anasemkati Tsüngrem tenüng nung pei lima aser nübortem meima tanurtem anepalu tenzük nung aruadoktsü. Tanü asünga tesem kar nungbo tesayurbo masü ser nung government nung ketdangser (administrators) karibo pei office nung mapa mali dangbo pei alidak peisasa tesayur kümer government school nung oagi sayuba osang tajung angashir. Tanü Nagaland tajungba küma yanglutsü asoshi government school nung sayutsü shimtetba tesayurtem ishika nüngdaker. Item tesayur ishika jagi khen bendanga agütsüshir tanurtem dang shitak sayu tenzük nungbo, Nagaland nung sayatenya ka atalok ama, khen nung government school-tem ajak jungadoktsü. Iba milenji koba tesem, koba school nungi tesayur shirnoki tama tsükloktsütsü ta bilema yongyaa atar.