ATI, Kohima nung NSS ketdangsertemi training agir

Dimapur, Tsüklai/Feb. 27 (TYO): Administrative Training Institute, Kohima nung February 27, 2020 nü NSS officer tem atema ‘Ethics and value for public Governance’ training ka agüja liasü.
Iba training indang tongmelang agi rateta jembiba mapang, Human Resource Consultant, Trainer aser Coach, Kiran Gandhi-i ashiba agi, taroktiba nung pei angatetba nungi nüburtem aniba sempet aser yimyatem tenzüker. Loktiliba tajung ka atema tangatetba aser jenjang balala renolokba nung kasa aintsü mechi iba sentong ya ayongzük, kong nisung ajak kasa züngshir aser akhumtsübua amshir aser asen taginüba peritsü asoshi amshiba hadir ka ama masü, ta pai ashi.
Temalen temelenshi tajung bener arutsü asoshi asenok ajaki rangloktsüla aser temelenshi ji asen dak nungi tenzüktsüla aser asen yimya aser libaliru nung ochishia ranglokba nungi asen sasa asen melenshir, ta Kiran-i ashi.
Mangatettep alibatem angatettepa aser taneptsü agütsüba ajanga lokti ka tamendakdak tashi itshitsü nükjidong nung iba sentong ya tenzük aser iba ajanga lenirtemi tangatetba tajung nung lokti ajangzüktsü asoshi pei agitsü mebilemi temelenshi bener arutsü asoshi lokti tenzükba nung tashi agütsür, ta pai ashi.
‘Challenges and Opportunities’ onük nung ajemdaker Niketu Iralu-i jembiba mapang, sorkar ketdangsertemi anogoshi tensa aser maongka balala azüokba agi tarutsü nung loktiliba asoshi mera agia atar, ta ashi. Naga nungertemi ajangshiba timtem kasa ya alima ajunga nung nisung meimchirtemi ajangshir ta pai ashi aser Democracy aser Rule of Law, tzümopung melenba, loktiliba-rongsenketsüng aser yimtenren tebilemtsü asoshi temulung tali agütsütsü nüngdaker, ta ashi.
Iba sentong nung Commissioner and Secretary, P&AR, Dinesh Kumar IAS ajanga okila liasü. Pai ashiba agi, iba training sentong ka khenyongi balaka, ajaki shilem agiba aser kangadang nüngdaka aliba ka lir. Libaliru yimya ya nisung shia dak keta lir aser tanur nem libaliru yimya tajung angazükdaktsütsü asoshi tsüraburi tongti shilem agitsüla, ta pai ashi.
Iba amala sentongtem ya kanga nüngdaker aser ethical Values atema tongtibang ta metetdaktsür, koba nungi nisung ka taküm arakzüa ainer, ta paisa ashi. Sorkar junga ketdangsütsü asoshi libaliru ya kanga tongtibang, ta Kumar-i ashi.
Iba sentong nung shisalen sayurtem ya Initiative of Change nungi liasü. Initiative of Change ya alima nung yimjung aser teyari agütsütsü asoshi diverse global network ajanga nükla ka yur tenzükba lir, kong nisung ajaki pei pei yari yimya balala nung shilem agir. Administrative Training Institute ajanga Initiative of Change den Government of Nagaland lungjemba maparen ya Chief Secretary Temjen Toy IAS lenisüba kübok tenzük. Iba sentong nung NSS officer 27 shilem agir.