BSF uniform semer mozü shibelenertem apu

Agartala, March 2 (Agencies): Border Security Force (BSF)-i tatalokba balala nung Rs 7.76 crore alang mozütem apu aser iba mapang BSF uniform semer mozü shibelenertem apu.
February 29 aser March 1 tsüngda aonung BSF sepaitemi Yaba süngjang 2000 (Rs.10,00,000), ganja seret 92 (Rs 7,82,000) aser tanga mozütem (Rs. 8,13,035) apu. Item ya ajak agi Rs. 25,95,035 shi alang liasü.
February 29 nü osang tejangja ka nung ajemdaker mita aodang BSF telok kati BSF uniform semer nisung ana apu.
Tena ya Alam Mia aser Jhutan Bhowmik na ta jangjaogo. BSF sepaitemisa Maruti Gypsy ka apu.
Tena ket nung BSF Identity Cards bena liasü aser gari reprangdang Rs 7,82,000 alang ganja seret 92, Eskuff Syrup pongdang 3, Niramin Syrup pongdang 2, Tiger energy drink pongdang 2 aser Indian currency notes Rs 7,355 tashi bena aliba angu.
Kasa aonung, tanga tatalokba ka nung BSF vehicle patrolling party-i arrtsü anasa motorcycle ka dak taitsü keta reprang.
Iba jagi BSF sepaitemi motorcycle anendaktsü saka idangji nisungtem jagi motorcycle ji toktsür jena ao.
Sepaitemi motorcycle reprangdang Rs 10,00,000 alang Yaba süngjang 2,000 aser Samsung mobile phone (Rs 10,000) ka angu.
Deobarnü BSF intelligence branch dang Assam nungi Yaba süngjang aika bener aruba osang ka sangoktsü.
Iba osangji SDPO, Bishalgarh den lemsatep aser parnok külem telok kati lenmang nung mita ata.
Anüngdang 12:00 ako meta NH-8 nung Maruti Eeco van ka soter mita reprangdang CNG gas cylinder tesülen tapok ka angu.
CNG gas cylinder lapoka reprangdangdang Yaba süngjang packet 15 nung sepbanger aliba angu. Item taseptsü nung Yaba süngjang lakh 1.5 bena liasü aser iba indang jenjangji Rs. 7.50 crore liasü.
Joint operation party-i gari indang driver Jahid Hossain apu aser pa den külemi Yaba süngjangtemji Bishalgarh Police Station ket nung agütsü.