Delhi rara dak sendakba nung Parliament nung rongrong adok

New Delhi, March 02 (Agencies): Tawa CAA anema longkak aitba dak sendakba nung north Delhi nung rara adokba tatalokba ken o nung Hombarnü Lok Sabha nung BJP-i aniba sorkar anema yimyim ayimba den külemi opposition züngsem kari timtem agütsüba ajanga nikongdang 4:00 ako tashi senden thinena liasü.
Tanep Lok Sabha senden tenzükli kasa onük nung rongrong adokba ajanga nikongdang 2:00 ako tashi senden thinen, ajisüaka 2:00 ako nung senden tanaben tenzükli Congress züngsemtemi ozülu balala amer sabangleni oa longkak ait, ibayongji 3:00 ako tashi senden thinen, ano maneni 4:00 ako tashi senden thinena liasü.
Budget tanabuba session mezüngbuba anogo nung Delhi rara dak sendakba nung opposition züngsemtemi yimyim ayimba ajanga Speaker, Om Birla-i züngsemtem dang pei mendeni oa amentsü mepishi ajisüaka Opposition MP temi maneni longkak ait.
Congress züngsemtemi Home Minister Amit Shah anendaktsütsü akhang aser Delhi rara dak sendakba nung Ato kilonser, Narendra Modi dang nungi telangzüba meshi. Sorkar anema Congress-i longkak aitbaji tanga opposition party karibo pusema liasü.
Speaker-i Lok Sabha nung Congress lenir, Adhir Ranjan Chowdhury dang party züngsemtem pei menden nung mendakjang, kechiyong züngsemtemji Parliament nung o lemteptsü atema shim, ta ashi. Ajisüaka Opposition züngsemtemi maneni longkak aita liasü.
Opposition-i maneni yimyim ayimaka Finance Minister, Nirmala Sitharaman-i Direct Tax Vivad Se Vishwas Bill, 2020 benoka liasü. Iba sülen iba bill dak sendakba nung BJP züngsem, Sanjay Jaiswal jembiba mapang nunga Speaker-i opposition züngsemtem yimyim ayimbaji songtemtsü meranga liasü.
Speaker-i Opposition dang, kodang Delhi nung tensa süngjemdir Parliament nung iba onük nung o lemteptsü, ta ashi.